Ата-анасының жағдайы ауыр: БҚО-да өртеніп кеткен бес бала оқиғасы туралы тың дерек

Батыс Қазақстан облысы Сырым ауданының Жымпиты ауылында өрт шығып, бес баланың өмірін қиды, деп хабарлайды janabastau.kz ақпарат агенттігі Ulysmedia.kz-ке сілтеме жасап. 

Оқиға 4 маусым күні күндіз тіркелген. Өрт туралы дабыл құтқару қызметіне сағат 15:03-те түскен. 

Өрт Жымпиты ауылындағы Қ. Сағырбаев көшесі, 8-үйде басталған. Өрт сөндірушілер оқиға орнына сағат 15:09-да жеткен кезде үйдің шатыры опырылып түскен, ғимарат түгел отқа оранып, аспанға қою қара түтін көтеріліп жатқан. Құтқарушылар тобы үш минут ішінде үй ішіндегі адамдарды сыртқа шығарып үлгерген. Алайда балалар ес-түссіз күйде ауруханаға жеткізілгенімен, өкінішке қарай, бес бүлдіршінді аман алып қалу мүмкін болмады. Ең кенжесі 2023 жылы туған – жасы әлі екіге де толмаған. 

Қайтыс болған балалардың ата-анасы мен жақын туыстары ауыр психологиялық күй кешіп отыр. 

Аталған факті бойынша сотқа дейінгі тергеу басталды.