Гидрологиялық болжам: биылғы тасқын кезеңі қалай өтпек

Наурыз айының басындағы жағдай бойынша «Қазгидромет» РМК 2026 жылғы көктемгі су тасқыны кезеңіне арналған негізгі гидрологиялық болжамын жариялады, деп хабарлайды JANABASTAU.KZ ақпарат агенттігі.

Алдын ала есептеулерге сәйкес, бірқатар өзендерде көктемгі ағын көлемі орташа көпжылдық нормадан едәуір жоғары болуы мүмкін. Бұл туралы брифинг барысында Ақмола облысы бойынша «Қазгидромет» РМК филиалының директоры Бахыт Мақажанова мәлімдеді.

Дәстүрлі түрде Есіл, Қалқұтан, Жабай, Сілеті және Шағалалы өзендерінде көктемгі тасқын наурыз айының екінші жартысында басталып, сәуір айының алғашқы кезеңіне дейін жалғасады.

Ал Нұра өзенінде су деңгейінің көтерілуі сәуір айының басында байқалады. Оның гидрологиялық режимі көршілес өңірдегі су қоймалары арқылы реттелетіндіктен, қосымша су жіберу көлемі Ақмола облысындағы жағдайға тікелей әсер етуі мүмкін.

Болжам метеорологиялық және гидрологиялық бақылау бекеттерінің деректеріне негізделген. Өткен күзде облыстың басым бөлігінде топырақ ылғалдылығы қалыпты деңгейден төмен болды.

Ал қыс мезгілінде жауын-шашын мөлшері, керісінше, орташа көпжылдық көрсеткіштен жоғары тіркелді. Бұл көктемде мол су жиналу қаупін күшейтеді. Топырақтың қату тереңдігі өткен жылмен салыстырғанда артқан.

Терең қатқан жер қар суының сіңуін қиындатып, судың жылдам ағынмен жиналуына әсер етеді. Соның салдарынан өзендерде су деңгейінің күрт көтерілу ықтималдығы сақталады.

Алдын ала бағалаулар бойынша, өңірдің негізгі өзендерінде көктемгі су көлемі қалыпты деңгейден жоғары болуы мүмкін. Бұл бірқатар учаскелерде қауіпті межеден асу тәуекелін арттырады.

«Қазіргі таңда жағдай тұрақты бақылауда. Гидрологиялық болжам жүйелі түрде жаңартылып отырады. Егер гидрометеорологиялық ахуал күрт өзгерсе, ақпарат жедел түрде нақтыланып, тиісті органдарға жеткізіледі», – деп атап өтті Бахыт Мақажанова.

Осыған байланысты өңір аудандары тәуекел деңгейіне қарай санаттарға бөлінді. Бірқатар аудандар жоғары қауіп аймағына енгізілсе, кейбір өңірлерде қауіп орташа деңгейде бағаланып отыр. Ал оңтүстік бағыттағы аудандарда жағдай салыстырмалы түрде тұрақты деп сипатталады.

Синоптиктердің болжамына сәйкес, ай соңында ауа температурасының көтерілуі және жаңбыр түріндегі жауын-шашын қардың жаппай еруін жеделдетуі мүмкін. Бұл тасқынның ертерек басталуына ықпал етуі ықтимал.

Жалпы алғанда, биылғы көктемде мол қар қоры, топырақтың терең қатуы және жылудың ерте түсу ықтималдығы тасқын қаупін күшейтіп отыр. Мамандар жағдайды тұрақты бақылауда ұстап, алдын алу шараларын уақытылы қабылдаудың маңыздылығын ескертуде.