Қазақстан мен Ресей шекарасында жүздеген жүк көлігі тұрып қалды

Ақтөбе облысы бойынша Мемлекеттік кірістер департаменті мен кәсіпкерлер палатасының қызметкерлері Мәртөк ауданындағы "Жайсаң" – "Сағаршын" халықаралық автокөлік өткізу бекетіндегі жағдайды тексерген. Мониторинг қорытындысына сай, шекарада жүздеген жүк көлігі тұрып қалғаны анықталған, деп хабарлайды "Диапазон" басылымына сілтеме жасаған JANABASTAU.KZ.

"Мониторинг қорытындысы бойынша шекарадан өтуді күту уақыты 24 сағаттан асатыны анықталды. Өткізу пунктіне таяған тұста 360-қа жуық жүк көлігі жиналып қалған, тағы 250-ге жуық ауыр жүк көлігі Саржансай ауылының маңында өз кезегін күтіп тұр. Осылайша, шекарадан өтуді күтіп тұрған көлік құралдарының жалпы саны 600-ден асады", — деп хабарлады Кәсіпкерлер палатасы.

Тексерушілердің мәліметінше, көліктердің жартысынан көбі тез бұзылатын өнімдерді тасымалдап жатыр. Мысалы, Өзбекстаннан шыққан фуралар Мәскеуге көкөніс пен жидек апара жатыр, ал шекарада ұзақ күту салдарынан тауар бұзылып, кәсіпкерлер шығынға батуда. Кәсіпкерлер палатасы тасымалдаушыларға сілтеме жасай отырып, кептеліске іргелес жатқан "Сагарчин" өткізу пунктінің өткізу қабілетінің шектеулі болуы себеп екенін айтты. Қабылдаушы тарапта тек бір кіру жолағы жұмыс істеп тұр, бұл ретте басымдық жолаушылар мен жеңіл көліктерге беріледі, содан кейін ғана жүк көліктері өткізіледі.

Сонымен бірге Қазақстан тарапында көлік құралдарын өткізу пункті инфракұрылымының қазіргі жүктемесін ескере отырып, штаттық режимде жүріп жатыр. Кәсіпкерлер палатасы, сондай-ақ жағдайды тұрақтандыру және көлік құралдарының кедергісіз қозғалысын қамтамасыз ету үшін шаралар қабылдау мүмкіндігін қарастыру өтінішімен Орынбор облысындағы Кәсіпкерлердің құқықтарын қорғау жөніндеге уәкілге жүгінгенін мәлімдеді.