QC Holding Балаларды қолдау орталығына музыкалық жабдық тарту етті

 Балаларды қорғау күніне орай QC Holding құрылыс компаниясы Рудный қаласындағы Балаларды қолдау орталығына (бұрынғы балалар үйі) 1 миллион теңге көлемінде музыкалық аппаратура сыйлады. Бұл туралы Janabastau.kz ақпарат агенттігі хабарлайды iagorod.kz-ке сілтеп. 

QC Holding компаниясы 2023 жылдан бастап Рудный қаласында құрылыс жұмыстарын жүргізіп келеді және сол уақыттан бері жергілікті "Балаларды қолдау" орталығымен тұрақты байланыс орнатқан. Компания орталық тәрбиеленушілерінің түрлі қажеттіліктерін өтеуге жүйелі түрде қолдау көрсетуде.

– Біз мүмкіндігімізге қарай балалардың түрлі мұқтаждықтарын өтеп келеміз. Мысалы, жақында балалар мен жасөспірімдерге арналған заманауи, қызықты кітаптар сатып алдық. Олардың қатарында көркем әдебиет, бизнес әдебиет және психология тақырыбындағы туындылар бар. Жаңа шыққан кітаптарды таңдауға тырыстық. Сонымен қатар, біз қолөнер бойынша шеберлік сағаттарын, ұлдар үшін спорттық жарыстар ұйымдастырдық. Әдеттегідей, балаларға сыйлықтар – жемістер, шырындар мен тәттілер таратылды, – деді QC Holding компаниясының өкілі.

Жақында орталыққа жаңа музыкалық жабдық қажет екені анықталған. Себебі, мұнда көптеген бала вокалмен айналысады, музыкалық аспаптарда ойнайды, концерттер ұйымдастырады. Компания орталық әкімшілігімен бірлесіп қажетті жабдықтар тізімін жасап, дүкен мен жеткізушіні таңдады. Таңдалған техника Алматы қаласындағы дүкеннен сатып алынып, Рудныйға тікелей жеткізіледі.

QC Holding өкілі Айза Аблакимнің айтуынша, жаңа жабдық – қуатты екі колонканы қоса алғанда – орталық ішінде қолданылса, ескі аппаратураны балалар сыртқа іс-шараларға алып шыға алады.

– Біз бұл арқылы балалардың шығармашылық әлеуетін ашуға сеп боламыз деп сенеміз. Егер алда орталыққа тағы бір көмегіміз қажет болса, қолдау көрсетуге дайынбыз. Сонымен қатар, орталықта интернетпен байланысты қиындықтар бар екенін білдік, бұл мәселені де шешуге тырысамыз, – деді Айза Аблаким.

Балалар орталығының директоры Павел Коваль QC Holding компаниясына алғыс хат табыстап, осындай сенімді серіктестердің бар екеніне ризашылығын білдірді.