Жапон партиясы ЖИ-ді басшы етіп тағайындады

Жапониядағы жаңа саяси партия сейсенбі күні өз көшбасшысы ретінде жасанды интеллектіні тағайындайтынын жариялады. Бұл партияның негізін қалаушы, ерекше тұлға саналатын Синдзи Исимару соңғы сайлаудағы сәтсіздіктен кейін отставкаға кеткен болатын, деп хабарлайды JANABASTAU.KZ ақпарат агенттігі japantimes.co.jp сілтеме жасап. 

«Қайта түлеу жолы» партиясы 2025 жылдың қаңтарында құрылған. Оны Батыс Жапониядағы шағын қаланың бұрынғы мэрі Синдзи Исимару ұйымдастырған. Партияның нақты саяси бағдарламасы жоқ, ал мүшелері өздерінің жеке бағыттарын еркін қалыптастыра алады.

Исимару 2024 жылғы Токио губернаторы сайлауында күтпеген жерден екінші орынға шықты. Бұл оның онлайн науқанының сәтті өтуінің нәтижесі еді. Дегенмен, партия осы жылы Жоғарғы палата сайлауында бір орынға да ие бола алмады, сондықтан Исимару басшылықтан кетті.

Жаңа көшбасшы ретінде жасанды интеллектіні тағайындау туралы хабарды Коки Окумура жасады. Ол жасанды интеллект саласында зерттеу жүргізіп жүрген 25 жастағы докторант және өзін «жаңа көшбасшының көмекшісі» деп сипаттайды. Окумураның айтуынша, ЖИ қашан және қалай енгізілетіні әлі нақты шешілмеген.

ЖИ партия мүшелерінің саяси іс-әрекетіне араласпайды, бірақ ресурстарды бөлу сияқты ұйымдастырушылық шешімдерді қабылдауда басты рөл атқарады. Коки Окумура жуырда Исимарудың орнына партия ішінде өткізілген байқауда жеңімпаз атанған.

Дегенмен, «Қайта түлеу жолы» партиясы сайлауда сәтсіздікке ұшырады. Маусымдағы Токио ассамблеясы сайлауында оның 42 кандидатының барлығы жеңіліп, шілдеде өткен Жоғарғы палата сайлауына қатысқан 10 кандидаты да жеңіле қалды.