Аса ірі мөлшердегі алаяқтық – Алматыда «Нұр Отанның» экс-идеологы Боқаевтың ісі бойынша кезекті сот отырысы басталды

Бүгін Алматы қаласының Алмалы аудандық сотында «ҚазТрансГаз» АҚ бас директорының бұрынғы кеңесшісі әрі «Нұр Отан» партиясының экс-идеологы Санжар Боқаевқа, оның жиені Мадияр Қалменовке және жеке мобилографы Ұлан Нүсіпқожаға қатысты қылмыстық іс бойынша кезекті сот отырысы басталды, деп хабарлайды JANABASTAU.KZ ақпарат агенттігі.

Алдыңғы сот отырысында мемлекеттік айыптаушы күдіктінің кінәсі бойынша актіні жариялаған болатын. Санжар Боқаевқа Қазақстан Республикасы Қылмыстық кодексінің бес бабы бойынша айып тағылған. Атап айтқанда, аса ірі мөлшердегі алаяқтық (190-бап), қылмыстық жолмен алынған ақшаны заңдастыру (218-бап), ұрлық (188-бап), ағаштарды заңсыз кесу (340-бап) және көрінеу жалған ақпарат тарату (274-бап). Ал оның жиені Мадияр Қалменовке алаяқтық және қылмыстық жолмен алынған кірістерді заңдастыру, ал мобилограф Ұлан Нүсіпқожаға ұрлық, ағаштарды заңсыз кесу және көрінеу жалған ақпарат тарату айыптары тағылған.

Айыптаудың негізгі эпизодтарының бірі 42 миллион теңгеден астам қаражатты жымқыруға қатысты. Прокуратура нұсқасы бойынша, 2018 жылы Боқаев пен Қалменов «ҚазТрансГаз» компаниясының кәсіподағы үшін газмоторлы техника қатысатын автокеруен өткізуге бөлінген қаражатты шығарып алу схемасын ұйымдастырған.

Алдыңғы сот отырысында жарияланған мәліметтерге сәйкес, С.Боқаев өзінің бақылауындағы кәсіпорынды жиенінің атына қайта рәсімдеуді ұсынған. Осыдан кейін іс-шараның қаражат есебіне негізсіз көтерілген шығындар мен іс жүзінде көрсетілмеген қызметтер енгізілген. Сметаның жалпы сомасы 86 миллион теңгені құраған. Айыптау тарапының мәліметінше, оның 42 миллион теңгеден астамы жымқырылған. Мемлекеттік айыптаушының пайымдауынша, кейін бұл қаражат Астанадағы жиһаз өндірісінің жалдау ақысын төлеу, жабдық сатып алу және өзге де қаржылық операцияларға жұмсалу жолымен заңдастырылған.

Тағы бір эпизод қолдан ұйымдастырылған қылмыстық әрекеттерге қатысты. Мұндай заңға қайшы әрекеттерге күдіктілер әлеуметтік желілерге арналған бейнематериалдар түсіру мақсатында барған. Мемлекеттік айыптау нұсқасына сәйкес, Боқаев пен оның мобилографы өздері ұйымдастырған құқықбұзушылықтарды жай ғана түсіріп қоймай, кейін материалды қоғамда резонанс тудыру үшін пайдаланған.

Атап айтқанда, прокурордың мәлімдеуінше, айыпталушылар Үлкен Алматы өзенінің жағалауын қайта жаңғыртуға арналған нысаннан 12 гранит тақтаны ұрлауды ұйымдастырған. Оқиға бейнекамераға түсіріліп, кейін бейнежазба әлеуметтік желілерде мердігерлер мен әкімдік қызметкерлерінің заңсыз әрекеттерін әшкерелейтін материал ретінде таратылған.

Осыған ұқсас айыптаулардың ішінде Баума тоғайындағы заңсыз кесілген ағаштар да бар. 16 ағашты кескен немесе зақымдаған орындаушыларға ақшалай сыйақы берілген. Бұдан кейін іс фигуранттары ағаштардың заңсыз кесілгенін өздері анықтағандай көрініс жасап, болған оқиғаны кезекті әшкерелеу ретінде ұсынған.