Кітапхана түні: Ғажайып атмосфера

Қосшы қаласының кітапханасында қалың оқырманның қатысуымен «Кітапханадағы ғажайып түн» атты ерекше басқосу өтті. Негізгі мақсат – кітапхана қорымен таныстырып, еркін форматта ақындардың өлеңін оқу, қызықты тапсырмалар орындау. Көп кітап...Балауыз шам...Кітап сүйер оқырман...Баяу музыка...Кітапхананың түнін, бөлек атмосферасын сезіну үшін басқа не керек?! Есіктен кіргеннен бөлек әсер беретін бөлме ішінде шытырман оқиға, ертегі әлемі, фантастика, махаббат маусымына тап болатындайсың. Әркімнің алар үлесі бар бұл жерден. Басқосудың барысында ой сергітіп алмақ мақсатта түрлі жұмбақтар жасырылды. Ескі мен жаңа кезеңнің жұмбақтарын жарыса шешкен оқырмандар ойлау жүйелерінің қаншалықты жылдам екендігін аңғара түскендей. Жұмбақтың мақсаты да сол, оқырманның шапшаңдығы мен логикалық ойлау жүйесін таразылау. Бұдан кейін оқырмандар кинофильмдердің үзінділері арқылы оның атауы мен авторын тауып жарысты. «Қыз Жібек», «Менің атым Қожа», «Қан мен тер», «Гауһартас», «Көшпенділер», «Гарри Поттер» сияқты көптің көңілінен шыққан фильмдердің атауын білгенімен, көпшілік оның авторына келгенде ақсайтыны білінді. Кезек қазақтың біртуар батырлары мен олардың сәйгүліктерін сәйкестендіруге келді. Батырлар жырын жаттап өскен үлкендер жағы бұл сыннан сүрінбеді. Бұдан кейін елдің ықыласына бөленген шығармалардан үзінді оқылып, оның авторы мен атауын табу тапсырылды. Оқырмандар бұл сыннан да сүрінбей, білімдерін кәдеге жарата білді. Кездесу соңына қарай келушілердің арасынан өз еріктерімен поэзиядан үзінді оқып, әдемі әсер сыйлағандар да болды. Ақиық ақын Мұқағали Мақатаевтың өлеңдерін жатқа оқып, нақышына келтіріп жеткізген жастардың көптігі қуантты. Оның айтуынша, кітапханадан тек кітап алып оқып қана қоймай, өзінің білгенімен бөлісіп, қордың арта түсуіне үлесін қосқысы келетін қала тұрғындары да бар екен. «Жақсы кітап – жақсы адамның әңгімесімен бірдей» деп Лев Толстой өз кезеңінде кітаптан алған білімнің артықшылығын бір ауыз сөзбен жақсы жеткізе білген. Федор Достоевский «Маңызды кітаптарды оқы. Қалғанын өмірдің өзі үйретеді», деп өшпес өсиет қалдырған. Ал қазақтың дара жазушысы, драматург Мұхтар Әуезов: «Кітап аяулы досы бола бастаған шақтан былай ғана әрбір жан өзін интеллигент бола бастадым деп санауына болады», деп кітаптың адамзаттың дамуы үшін маңыздылығын ерекше айтып өткен. Шарада білімін толықтырып, білгенімен бөліскен мектеп оқушысы Маржан Ержанова: «Мен шетелдің қазақ тіліне аударылған шығармаларын көп оқимын. Жақында оқып, ерекше сезімге бөлеген Сайын Мұратбековтің «Жабайы алма» шығармасы болатын. Басты кейіпкерлері үлгі болатындай шығармалар есімде ұзақ сақталып, ұмытылмастай әсер береді. Құрбыларыммен кітапханаға жиі келуге тырысамыз. Бүгінгі басқосу ерекше өтті. Оқыған шығарма, көрген фильмдеріміздің авторы мен атауын, кейіпкерлерін есте сақтай жүру керек екендігін ұққандаймын», дейді өзінің алған әсерін жеткізіп. Кітапхана басшылығы алдағы уақытта да оқырмандар үшін қызықты болар бірқатар шараның бар екендігін айтты. Қосшы қаласында тұратын елге танымал ақын, жазушылармен кездесу де келер уақыт еншісінде.

Гүлназ БИСЕН