Құрылыс күні мерекесінде жолшылар марапатталды

23.08.23 сағат 10:07 Жаңалықтар

218

Құрылысшылар күніне орай «Жол активтерінің Ұлттық сапа Орталығы» РМК филиалының қызметкерлері марапаттарға ие болды. Ұжымды кәсіби мерекемен құттықтай отырып, филиал директоры Талғат Қайратхан қызметкерлерді көп жылғы қажырлы еңбегі мен өз ісіне адалдығы үшін алғысын білдірді. Ол жол-құрылыс саласын дамытуға әр жолшының жоғары кәсібилігі мен қосқан үлесін атап өтті.

«Біз жол құрылысы саласындағы өзгерістерді көріп отырмыз. Әрқайсыңыз автомобиль жолдарының сапасын жақсартуға көп күш жұмсай отырып, үлкен жұмыс істейсіз. Сондықтан сіздің еңбегіңіз – болашаққа деген үміт және ертеңгі күнге деген сенімділік. Соңғы жылдары тек Ақмола облысында мың шақырымнан астам жол жөнделуде. Ол үлкен көрсеткіш», - деп атап өтті Талғат Қайратхан.

Айта кетсек, Қазақстан Республикасы Индустрия және инфрақұрылымдық даму министрі Марат Қарабаевтың Құрмет грамотасына сапаны бақылау және мемлекеттік есепке алу бөлімінің инженері Жанат Саликов ие болды. Индустрия және инфрақұрылымдық даму министрі атынан алғыс хатымен жылжымалы жол зертханасының жүргізушісі Қонысбек Жақыповтың көп жылдық еңбегі атап өтілді. Еңбектегі жоғары көрсеткіштері мен кәсіби қызметіндегі жетістіктері үшін инженер Абылай Төлеуов пен сарапшы Сәкен Мұқышевке бірінші және екінші дәрежелі «Сапа шыңы» жол активтерінің Ұлттық сапа Орталығының арнайы төсбелгілері табысталды.

«Менің жұмысымның осындай құрметке бөлінуі үлкен қуаныш. Айта кету керек, жол салушы мамандығы әрқашан сұранысқа ие. Бірақ сонымен бірге бұл оңай жұмыс емес және үлкен жауапкершілік. Менің жолшы әріптестерім де марапаттарға ие болғанына қуаныштымын», - деп атап өтті жол инженері Жанат Саликов.

Сондай-ақ, сапаны бақылау және мемлекеттік есепке алу бөлімінің бастығы Игорь Стефан, материалдар жөніндегі инженер Николай Макаренко, жалпы мәселелер жөніндегі маман Жадыра Серікжан филиал директоры Талғат Қайратханның атынан Алғыс хатпен марапатталды. Соңында филиал директоры Талғат Қайратхан жол-құрылыс саласы еліміздің инфрақұрылымдық дамуының негізгі бағыттарының бірі болып табылатынын атап өтті. Сондықтан жолшыларға үлкен жауапкершілік жүктеледі және филиал ұжымының алдында өңірдегі автомобиль жолдарының сапасын қамтамасыз ету бойынша маңызды міндеттер тұр.