Мәсімовтің сенімді адамы Дубайда миллиардтық пәтер иесі болды

Айгүл Нұриева Дубайда миллиардтаған теңгелік пентхаусқа иелік етеді, деп хабарлайды janabastau.kz. 

Кәрім Мәсімовтің бұрынғы сенімді адамы әрі көмекшісі Айгүл Нұриева Дубайдағы Palm Jumeirah ауданында құны миллиардтаған теңгеге бағаланатын екі қабатты пентхаусқа иелік етеді. Пәтерінің ауданы 490 шаршы метр, төрт жатын бөлме, бірнеше қонақ бөлме, жеті жуыну бөлме, үлкен асхана және қызметшілерге арналған бөлмесі бар. Қазіргі бағасы шамамен 14,5 млн дирхам немесе 2,2 млрд теңге.

Сонымен қатар, Нұриева Тынық мұхитының ортасындағы Американ Самоасынан ықтиярхат алған. Бұл құжат оған АҚШ азаматтығын алу мүмкіндігін береді. Егер азаматтық алса, оны Қазақстанға экстрадициялау мүмкін болмай қалуы мүмкін.

2000-жылдардың ортасында Нұриева Назарбаевтар әулетімен байланысты компанияларда қызмет етіп, «Қазақтелеком» пен «Қазкоммерцбанк» секілді ірі активтердің үлесіне ие болып, байлығы шамамен 1 млрд доллар деп бағаланған. Ол ұзақ жылдар бойы Кәрім Мәсімовтің көмекшісі болып, жеке мүдделерін де атқарып келген.

Нұриева бірнеше даулы келісімдерге қатысқан. Соның ішінде «Қазақтелекомның» «GSM Қазақстан» (Kcell) үлесін TeliaSonera компаниясына 1,5 млрд долларға сату ерекше назар аударған. Кейін Kcell акциялары әлдеқайда төмен бағамен Лондон биржасында сатылған. Сарапшылар бағадағы айырмашылық Мәсімов пен оның сенімді адамдарына пайда әкелген деп есептейді.

Қазақстаннан шығарылған қаражатқа Нұриева әлемнің түкпір-түкпірінен жылжымайтын мүлік сатып алған. Ұлыбритания, Франция, Гонконгта ол өз атымен де, бұрынғы күйеуі Ғафур Ихсанның атымен де пәтерлер мен виллалар иеленген. Жалпы құны 90 млн доллардан асады, оның қаржылық белсенділігі Ұлыбританияда құқық қорғау органдарының назарына ілікті.

Айгүл Нұриева бірнеше паспорт пен ықтиярхатқа ие: Қазақстан азаматтығы, Кипр паспорты, Ұлыбритания мен Гонконгтағы ықтиярхаттар, сондай-ақ АҚШ-қа апаратын Американ Самоасының резиденттік куәлігі бар.