Қосшыда 1500 оқушыға арналған жаңа мектептің құрылысы 90 пайызға аяқталды

Қосшы қаласында білім беру инфрақұрылымын дамыту бағытындағы маңызды жобалардың бірі жүзеге асырылуда. Мұнда бір ауысымда 1500 оқушыны қабылдауға қауқарлы жаңа жалпы білім беретін мектептің құрылысы жалғасып жатыр. Жаңа оқу орны қаладағы мектеп орындарына деген сұранысты азайтып, балаларға заманауи әрі қолайлы ортада білім алуға мүмкіндік бермек, деп хабарлайды JANABASTAU.KZ ақпарат агенттігі. 

Жобаның жалпы құны 12 млрд 986,9 млн теңгені құрайды. Құрылыс жұмыстарын «BI Urban Construction» ЖШС жүргізуде. Нысанды пайдалануға беру 2026 жылдың соңына жоспарланған.

Жаңа мектептің ғимараты 92,7 × 62 метр көлемінде жобаланған. Мұнда бастауыш сыныптан бастап жоғары сыныпқа дейінгі оқушыларға арналған оқу кабинеттері мен қажетті инфрақұрылым қарастырылған. Мектептің жалпы сыйымдылығы 1500 орынға есептелген. Оның ішінде 500 орын бастауыш сынып оқушыларына, 625 орын орта буынға, 250 орын жоғары сыныптарға, ал 125 орын мектепалды даярлық топтарына бөлінген.

Сонымен қатар білім ордасында 274 орындық асхана, 297 орынға арналған акт залы және 24 орындық оқу залы бар кітапхана болады. Бұл балалардың тек білім алып қана қоймай, шығармашылық қабілеттерін дамытуына және бос уақытын тиімді өткізуіне де жағдай жасайды. Мектептің штаттық құрамы 200 адамды құрайды.

Қазіргі уақытта нысанда құрылыс-монтаж жұмыстары бірнеше бағыт бойынша жүргізілуде. Атап айтқанда, монолитті қаңқаны тұрғызу, абаттандыру және өзге де жұмыстар қатар атқарылып жатыр. Іргетас қалау жұмыстары толық аяқталған. Бүгінде құрылыс жұмыстарының жалпы орындалу деңгейі 90 пайызға жетті. Алдағы кезеңде қалған жұмыстарды аяқтап, нысанды белгіленген мерзімде пайдалануға беру көзделіп отыр.

Қосшы қаласының қарқынды дамуы әлеуметтік инфрақұрылымға, соның ішінде мектептерге деген сұранысты арттырып отыр. Осы тұрғыдан алғанда, жаңа білім ордасының салынуы қала үшін маңызды қадам болмақ.

1500 оқушыға арналған мектеп пайдалануға берілгеннен кейін балалардың білім алуына қосымша орындар ашылып, қолданыстағы мектептердің жүктемесін азайтуға мүмкіндік туады. Ең бастысы, жас ұрпақтың сапалы білім алып, жан-жақты дамуына қажетті жағдай қалыптасады. Жоба қала тұрғындары үшін қолайлы білім беру ортасын қалыптастыруға және Қосшының әлеуметтік инфрақұрылымын одан әрі дамытуға бағытталған.