Трамп Тегеранның келіссөз сұрағанын мәлімдеді

АҚШ Президенті Дональд Трамп жексенбі күні The Atlantic басылымына берген сұхбатында АҚШ-тың әскери операциясынан кейін Иран басшылығы Вашингтонмен келіссөз жүргізгісі келетінін айтып, өзі оған келісім бергенін мәлімдеді, деп хабарлайды JANABASTAU.KZ ақпарат агенттігі theatlantic.com агенттігіне сілтеме жасап. 

«Олар сөйлескісі келеді, мен келісіп отырмын, сондықтан олармен сөйлесемін. Оларға мұны ертерек істеу керек еді. Олар бұған дейін-ақ өте практикалық әрі оңай жүзеге асатын ұсыныс жасауы тиіс болатын. Олар тым ұзақ күтті», – деді АҚШ басшысы.

Трамп келіссөз 1 немесе 2 наурызда өте ме деген сұраққа жауап беруден бас тартып, соңғы апталарда АҚШ-пен келіссөздерге қатысқан Иран өкілдерінің кейбірі қаза тапқанын атап өтті. Республикалық саясаткер Тегеран «мұны ертерек жасауы керек еді» деген ойды қайталады.

«Олар келісім жасай алатын еді. Мұны ертерек істеуі керек болатын. Олар тым айлаға салды», – деді Ақ үй басшысы.

Сонымен бірге CNBC телеарнасына берген сұхбатында Трамп АҚШ-тың Ирандағы операциясы «өте жақсы алға жылжып жатқанын» айтты.

«Бұл – өте қатыгез режим, тарихтағы ең қатыгез режимдердің бірі. Біз өзіміз үшін ғана емес, бүкіл әлем үшін де жұмыс істеп жатырмыз. Барлығы жоспардан да жылдам жүріп жатыр», – деді Трамп.

Ал Иранның сыртқы істер министрі Аббас Арақчи АҚШ-пен келіссөз арқылы қақтығысты реттеу мүмкіндігі жөнінде пікір білдіріп, Тегеранның Вашингтонмен келіссөз жүргізу тәжірибесі «өте ащы» болғанын айтты.

«Соңғы 12 айда біз АҚШ-пен екі рет келіссөз жүргіздік, екі жағдайда да олар келіссөз жүріп жатқан кезде бізге шабуыл жасады. Бұл біз үшін өте ащы тәжірибе болды», – деді министр ABC арнасына берген сұхбатында.

Бұған дейін Трамп Тегеран келісімге жақын болғанымен, кейін шегініп кеткенін айтып, Иран шын мәнінде мәміле жасауды қаламады деген қорытынды шығарған.

«Қалай болғанда да, оларға бұл шабуылдың салдарын еңсеруге бірнеше жыл қажет болады», – деді Трамп.

The Wall Street Journal басылымы Иран ақпанда Женевада өткен келіссөздерде АҚШ-тың шарттарын қабылдамағанын жазған. Онда Вашингтон Фордо, Натанз және Исфахандағы үш ядролық нысанды жоюды және байытылған уран қорын толық тапсыруды талап еткен.