7 жасар Айзеренің қазасынан кейін туыстары әділдік сұрайды

Қайғылы оқиға Алматы жұртшылығын дүр сілкіндірді
Алматы қаласында 7 жасар Айзере жол апатынан көз жұмды. Қара жамылған отбасы мен қайғыға ортақтасқан ауыл тұрғындары бүлдіршіннің жаназасына түгел жиналды. Бұл туралы Janabastau.kz хабарлайды. Жазмыштан болған ауыр оқиға елдің қабырғасын қайыстырды. Қайғыдан қан жұтқан отбасы тек жүк көлігі емес, автобус жүргізушісі де жауапкершілікке тартылсын деген талап қойып отыр.

Трагедияның мән-жайы
Оқиға болған күні Айзере автобус жанынан өтіп бара жатқанда қатты жылдамдықпен келе жатқан көліктен шошып, артқа шегінген. Сол сәтте жүк көлігі оны қағып, қыз бала сол жерде жан тәсілім етті. Айзеренің ағасы Шухрат Ментеевтің айтуынша, автобус жүргізушісінің агрессивті жүрісі балаға қорқыныш ұялатып, қайғылы жағдайға себеп болған.

«Автобус жүргізушісі қатты жүйткіп келе жатты. Сол себепті қарындасым артқа шегініп, жүк көлігінің астына түсіп кетті. Бұл – жай ғана кездейсоқтық емес, бұл – салғырттық», – дейді ол.

Жүк көлігі жүргізушісі қамауға алынды, ал автобус жүргізушісі әзірге тергеуде
66 жастағы жүк көлігі жүргізушісі қазіргі таңда уақытша қамауға алынған. Ал автобус жүргізушісіне қатысты әзірге ешқандай айып тағылмаған. Алматы қалалық Полиция департаментінің ресми өкілі Салтанат Әзірбектің мәлімдеуінше, қазір бұл іске қатысты бірнеше сараптама жүргізіліп жатыр.

«Қылмыстық іс аясында сот-медициналық, автотехникалық және басқа да сараптамалар тағайындалды. Әрбір қатысушы тұлғаның әрекетіне құқықтық баға беріледі», – деді ол.

Қауіпті өткел – ескерусіз қалған адам өмірі
Оқиға болған жаяу жүргіншілер өткелі тұрғындар үшін бұрыннан қорқынышты. Айтуларынша, дәл осы жолда соңғы бір жылдың ішінде 8 адам қаза тапқан. Тағы 16 адам жарақат алып, аман қалған. Бірақ сол уақыттан бері өткелге қауіпсіздік шарасы ретінде бағдаршам орнатылмаған.

«Біз осы жолға бағдаршам орнатуды қаншама жылдан бері сұрап келеміз. Бірақ ешкім тыңдамайды. Енді қанша баланың өмірі қиылуы керек?», – дейді жергілікті тұрғын Айжан Нұрхалиева.

Айзере – балалықтың символы еді
Қапыда қаза тапқан Айзере – отбасындағы төрт баланың үшіншісі болған. Екі әпкесі мен інісі қалған. Үш аптадан кейін 8 жасқа толатын еді. Бұл – тек бір отбасының ғана емес, тұтас қоғамның жоғалтқан қазынасы.

Қоғамнан әділет сұрайтын үн
Бұл оқиға – тек бір жол апаты емес, бұл – жауапкершіліксіздік пен салғырттықтың салдары. Айзерені жер қойнына тапсырған отбасы мен ауыл тұрғындары тек кінәлілердің түгел жазалануын емес, сондай қайғының қайталанбауын қалайды. Ең бастысы – балалардың өмірін сақтап қалу үшін нақты шаралар қабылдануы тиіс.