Алаш зиялылары және ұлт тілі

Тағылымды шараға ҚР Ғылым және жоғары білім Министрлігі Тіл саясаты комитетінің төрағасы, ғалым-алаштанушы Ербол Тілешов, қоғам қайраткері Оразкүл Асанғазы және ақын, жазушы «Ахмет. Ұлт ұстазы», «Міржақып. Оян, қазақ» фильмдерінің сценарисі Ұларбек Нұрғалымұлы қатысып, сөз сөйлейді. Алаш зиялыларының саяси және рухани күресіндегі негізгі мақсат, орасан міндет, ол ұлтымызды ұйыстыру, сол арқылы елдігімізді айқындау десек, онда осындай ұланғайыр сауапты істің аясында ана тілімізді сақтау мәселесі тұрды. Алаш қайраткерлерінің қай-қайсы да тілдің саяси, қоғамдық һәм рухани үлкен күш, ұлтты біріктіруші қуатты құбылыс екендігін жақсы сезінді. Сондықтан да Алаш сияқты аса ірі қозғалыстың рухани тінінде қазақ тілі мәселесі ерекше орынға ие болды. Қазақ тілінің тағдырына алаңдаған Оразкүл Асанғазы ұлттың сақталуы үшін тілдің қолданыс аясын кеңейтіп, қазақ мектебін көбейіп, жұмысын жүйелеуге басымдық беру керектігін алға тартты. Ал ғалым, алаштанушы Ербол Ердембекұлы ұлттың тағдыры үшін алаштықтардың позициясын ұстанып, елдің ертеңі үшін бүгіннен қалмай қызмет жасау керек екендігін нақты мысалдармен жеткізді. Көптің көңілінен шығып, жастардың рухын оятқан фильм сценарисі Ұларбек Нұрғалым Алаш тарихын жастардың жүрегіне жеткізіп, өткенімізге көз жүгіртіп, барды бағалау үшін жасалған жұмыстарды саралап берді. Жоғары деңгейде өткен ғылыми конференция алдағы уақытта да жаңа тақырыппен көрермен көңілінен шығары сөзсіз.

Дана Төлеген