Алматыда кәмелетке толмаған қызын қытайлардан қызғанған әке оны өлтіріп алды

Алматы қалалық соты кәмелетке толмаған қызының өліміне кінәлі ер адамға үкім шығарды. Қайғылы оқиға отбасылық жанжал мен ата-ананың бала тағдырына алаңдауы аясында болған, деп хабарлайды JANABASTAU.KZ ақпарат агенттігі MadeniPortal.kz-ке сілтеме жасап.

Қыз қытайлық кәсіпкерлерге аудармашы болып жұмыс істеген және ем қабылдау үшін Қытайға баруды жоспарлаған. Ата-анасы қыздарын алдап шетелге алып кетуі мүмкін деп күдіктеніп, 2025 жылғы 5 сәуірде шетел азаматтары тұратын пәтерге барған.

Тараптар арасында жанжал шыққан. Ұрыс кезінде қыздың әкесі пышақ алып, ер адамдардың біріне сілтеуге әрекеттенген. Алайда шешуші сәтте екеуінің арасына қызы түсіп қалған. Пышақ жүрек тұсына тиген. Көрсетілген көмекке қарамастан, қыз көз жұмды.

Бастапқыда ер адамға ауырлау баптар бойынша айып тағылған, алайда зардап шеккен шетелдік азамат шағымының жоқ екенін мәлімдегеннен кейін айып жеңілдетілген.

Сот әкені кінәлі деп танып, 4 жыл 6 айға бас бостандығынан айырды.