Аптап ыстықтан 50-ден астам адам қайтыс болды

Үндістанда қатты аптап ыстықтан үш күнде 50-ден астам адам қайтыс болды, деп хабарлайды Janabastau.kz тілгісі, ВВС-ға сілтеме жасап.

Демалыс күндері елдің солтүстігіндегі Уттар-Прадеш штатында аптап ыстықтан 33 адам қайтыс болды. Олардың ішінде жалпы сайлауға қатысқан адамдар, соның ішінде сайлау шенеуніктері, күзетшілер мен санитарлық қызметкерлер бар.

«Одиша штатында аптап ыстықтан 20 адам қайтыс болды», - деп мәлімдеді ресми тұлғалар.

Сонымен қатар Федералдық денсаулық сақтау министрлігі 1 наурыздан 30 мамырға дейін аптап ыстықтан 56 адам қайтыс болғанын мәлімдеді. Алайда штат бойынша деректер нақты санның айтарлықтай жоғары болуы мүмкін екенін көрсетеді.

Одиша штатында билік 72 сағат ішінде ыстықтан 99 адам қайтыс болғанын хабарлады, оның 20-сы расталды.

Сондай-ақ елдің Бихар, Мадхья-Прадеш және Джаркханд штаттарында аптап ыстықтан адамдар өлімі туралы хабарланды.

Үндістанның Ұлттық ауруларды бақылау орталығы аптап ыстықты «өмірге қауіп төндіретін» жағдай деп атады, одан болатын өлім көрсеткіші 40-тан 64%-ға дейін.

Үндістанның солтүстігі мен орталық бөлігінде және батыстың бір бөлігінде соңғы екі аптада адам шыдамас аптап ыстық болды, ең жоғары температура бірнеше күн қатарынан 45-46°C, кей аудандарда 50°C-қа дейін жетті.

Дегенмен, Үндістанның метеорологиялық департаментінің мәліметінше, муссонның басталуына байланысты алдағы күндері ауа температурасының төмендеуі мүмкін.

Елдің бірнеше өңірінде энергия тұтынудың артуына байланысты су мен электр қуатының тапшылығы қатты сезілуде.

Еске сала кетсек, бұған дейін Үндістан астанасы Делиде жаңа рекордтық ауа температурасы тіркеліп, термометр бағанасы +49,9°C-қа жеткені туралы жазған болатынбыз.