Ақкөл ауданында Сағадат Нұрмағамбетов атындағы сквер ашылды

Ақкөл ауданының Еңбек ауылында армия генералы, Кеңес Одағының Батыры, Қазақстан Республикасының алғашқы Қорғаныс министрі және «Халық қаһарманы» Сағадат Нұрмағамбетов атындағы сквердің салтанатты ашылуы өтті, деп хабарлайды janabastau.kz Өңірлік коммуникациялар қызметіне сілтеме жасап. 

Бұл маңызды шара көрнекті мемлекет және әскери қайраткердің туғанына 100 жыл толуына орай ұйымдастырылды.

Сквердің ашылуына Ақкөл ауданының әкімі Біржан Әбдірахманов, Қазақстан Журналистер Одағының мүшесі және Ақкөл ауданының құрметті азаматы, «Құрмет» орденінің иегері Еркін Дәуешов, сондай-ақ ауыл тұрғындары мен қонақтар қатысты. Сағадат Нұрмағамбетовтың өмірі мен қызметі батылдықтың, патриотизмнің және Отанға деген шексіз сүйіспеншіліктің символына айналды.

Сквердің ашылу салтанатында аудан әкімі Біржан Әбдірахманов сөз сөйлеп, Сағадат Нұрмағамбетовтің Қазақстан тарихындағы маңызы туралы ерекше атап өтті. Ол генералдың еліміздің қорғаныс саласын дамытуға қосқан елеулі үлесін, қазақ жауынгерінің ерлігі мен табандылығын ұрпақтар санасына сіңірудің маңыздылығын айтты. 

Аудан әкімі атап өткендей, Сағадат Нұрмағамбетов атындағы саябақ тек Ақкөл ауданының ғана емес, барлық қазақстандықтардың мақтанышы боларлықтай орынға айналатыны сөзсіз. Саябақ жастарға патриоттық тәрбие берудің, Отанға қызмет ету жолында табандылықты насихаттаудың символына айналады.

Сағадат Нұрмағамбетовтың есімі Қазақстанның әскери тарихында мәңгілікке қалды. Ол Кеңес Одағының Батыры атағын иеленіп, Ұлы Отан соғысы жылдарындағы батырлығымен ерекшеленді. Сонымен қатар, ол Қазақстан Республикасының алғашқы Қорғаныс министрі болып, еліміздің Қарулы Күштерінің негізін қалауға атсалысты. Оған көптеген мемлекеттік наградалар мен құрметті атақтар берілген, соның ішінде Қазақстан Республикасының ең жоғары марапаттары – «Халық қаһарманы» атағы мен «Құрмет» ордені бар.

Осы күні ауыл тұрғындары мен қонақтары Сағадат Нұрмағамбетовтың ескерткішіне гүл шоқтарын қойып, батырдың рухына тағзым етті. Бір минут үнсіздікпен еске алынған ұлы тұлғаның ескеркішіне деген құрмет әрбір адамға терең патриоттық сезім мен Отан алдындағы жауапкершілік сезімін оятты.

Ұлы тұлғалардың есімін ұрпақтар бойында сақтап, олардың ерліктерін насихаттау қазіргі таңда өте маңызды. Сағадат Нұрмағамбетов атындағы сквер елімізде патриотизмді арттырып, жастарды ел мен жерге деген сүйіспеншілікке тәрбиелеуде маңызды рөл атқарары сөзсіз.