Асад Сириядан кеткен соң алғаш рет үн қатты

Сирияның бұрынғы президенті Башар Асад елден қашып кеткеннен кейінгі алғашқы мәлімдемесінде Ресейге қашуды жоспарламағанын айтты. Бұл туралы janabastau.kz тілшісі BBC Орыс қызметіне сілтеме жасай отырып хабарлайды. 

Асадтың мәлімдемесі дүйсенбі күні бұрынғы сириялық президенттің Telegram-арнасында жарияланды, бірақ қазіргі уақытта бұл арнаны кімнің басқарып отырғаны белгісіз.

Мәлімдемеде сирия астанасы көтерілісшілердің бақылауына өткеннен кейін Асадтың «әскери операцияларды бақылау» үшін Латакия провинциясындағы ресейлік әскери базаға барғаны айтылған. Алайда, ол жерге жеткен кезде сириялық әскердің өз позицияларын тастап кеткенін көрген.

Мәлімдемеде Хмеймим авиабазасының да «дрондардың күшейтілген шабуылына» ұшырағаны және ресейлік әскери қызметкерлердің Асадты ұшақпен Мәскеуге жеткізу туралы шешім қабылдағаны айтылған.

Араб және ағылшын тілдерінде жарияланған мәлімдемеде бұрынғы сириялық көшбасшы өзінің ресейлік базаға қалай тұтқындалып қалғанын сипаттайды.

«Базадан шығу мүмкін болмағандықтан, Мәскеу базаның қолбасшылығынан 8 желтоқсан, жексенбі күні кешке Ресейге шұғыл эвакуация ұйымдастыруды сұрады, – делінген мәлімдемеде. – Бұл [эвакуация] Дамаск құлағаннан кейін және соңғы әскери позициялар жойылып, қалған мемлекеттік институттардың барлығы параличке ұшырағаннан кейінгі келесі күні жүзеге асты». 9 желтоқсан күні ресейлік БАҚ Асадтың Ресейден пана тапқаны туралы хабар таратты, бірақ бұған ресми түрде растау берілген жоқ. Кейін бұл ақпаратты Кремль растады.

Асадтың айтуынша, «Сирияда болған оқиғалар кезінде» ол отставкаға кетуді немесе елден қашуды ешқашан ойламаған және мұндай ұсыныстар оған түспеген.

Бірақ мәлімдемеде: «Мемлекет террористердің қолына өткенде және жағдайға ықпал ету мүмкіндігі жоғалғанда, кез келген лауазымның мәні де жоғалады», – делінген.

Көтерілісшілер Сирия қалаларын бірінен соң бірін бақылауға алған кезде Асад көпшілік алдында көрінбеді. Сол себепті оның елден қашып кеткені туралы қауесеттер тарай бастады.

Өткен аптада Reuters агенттігі Асадтың жақтастары мен туыстарын қашуы туралы ескертпегенін жазды. Басылым дереккөзіне сәйкес, ол елден кетерден бірнеше сағат бұрын арнайы қызметтердің және әскерилердің жоғары лауазымды қызметкерлерін жинап, «Ресейден әскери көмек жақында келеді» деп сендірген.

Бұған дейін Bloomberg агенттігі өз дереккөздеріне сілтеме жасап, Асадтың қашуын Ресейдің барлау қызметі ұйымдастырғанын хабарлады. Мәскеу оған қарулы топтармен, әсіресе исламистік топтармен күресте жеңілетінін айтып, өзін және отбасын қауіпсіз дәліз арқылы эвакуациялауға көндірген көрінеді.