Атырауда мектеп әкімшілігі оқушы қыздың төбелестен басы жарылғанын жасырған

Атырауда жекеменшік мектептердің бірінде 11-сынып оқушысына дене жарақатын келтіру дерегі бойынша қылмыстық іс қозғалды, деп хабарлайды JANABASTAU.KZ ақпарат агенттігі облыстық полиция департаментіне сілтеме жасап.

Қазір күдікті анықталды. Оның заңды өкілдерінің қатысуымен жауап алу жүргізілген. Оқиғаның барлық мән-жайын анықтау мақсатында кешенді тергеу амалдары жүріп жатыр.

Құқық қорғау органдарына дер кезінде жүгінбегені үшін сынып жетекшісі мен мектеп директорының іс материалдары Атырау облысының білім беру сапасын бақылау департаментіне жолданды.

Құқық бұзған кәмелетке толмаған жасөспірім ішкі істер органдарының есебіне қойылды, ал оның ісіне қатысты жиналған материалдар кәмелетке толмағандар ісі жөніндегі комиссияда қаралады, – делінген хабарламада.

«Ақ Жайық» басылымының мәліметінше, оқиға «Тағылым» жекеменшік мектебінде болған. Оқушы қыздың әпкесінің айтуынша, қыз дәретханада басын унитазға ұрып, ауыр жарақат алған. Ал мектеп қызметкерлері қанның ізін жуып, балалардан ештеңе айтпауды сұраған. Сөйтіп, жарақат алған оқушы бастапқыда отбасына өзінің «тайып құлағанын» айтқан. Кейін жанжалдасу кезінде қатарластары итеріп жібергенін мойындаған.

Туысының айтуынша, оқиға болған күні мектеп ата-аналармен байланыспаған. Не сынып жетекші, не әкімшілік болған жайт және баланың жағдайы жөнінде хабарламаған. Отбасы оқиға туралы тек кешкісін сыныптасының анасынан білген.

Атырау облысының білім басқармасы мектепте ішкі қызметтік тексеріс басталғанын хабарлады. Ведомство мәліметінше, мектеп қызметкерлері «дұрыс әрі жедел әрекет еткен».

Сондай-ақ басқармада мектеп қызметкерлері оқушыға алғашқы медициналық көмек көрсеткенін және оны бірден медициналық тексеріске баруға үгіттегенін мәлімдеді. Олардың айтуынша, қыз бұған келіспей, травмпунктке тек ағасымен бірге баратынын айтқан.