«Баяндаманы кім жазды сізге?»: депутат министрге сұрақты төтесінен қойды

08.10.25 сағат 03:50 Жаңалықтар

256

Фотосурет: gov.kz

Мәжілісте жаңа Құрылыс кодексінің жобасы талқыланды. Депутат Бақытжан Базарбек сейсмикалық қауіпті аймақтардағы құрылыс нормалары тым әлсіз екенін айтып, Алматыда биік үйлердің тікелей тектоникалық жарылымдардың үстіне салынғанын мәлімдеді, деп хабарлайды JANABASTAU.KZ ақпарат агенттігі SMARTNEWS.KZ-ке сілтеме жасап.

Баяндаманы кім жазды сізге? Кодекс жобасын құрылысшылардың өздері жазғандай әсер қалдырады. Менің сейсмикалық қауіпсіздікті күшейтуге бағытталған түзетулерімді жұмыс тобы қолдады, бірақ екі маңызды мәселе шешілмей қалды. Біріншіден, тектоникалық жарылымдарда құрылысқа тыйым саламыз ба? Алматыда 27 жарылым бар, оның 13-і толығымен көпқабатты үйлермен жабылған. Адамдар өздері жарылым үстінде тұратынын білмейді. Мысалы, Rams компаниясының 40 қабатты мұнарасы ені 600 метр болатын алтыншы диагональды жарылымның үстіне салынып жатыр. Екіншіден, таулы және сел қаупі бар аймақтарда құрылысқа шектеу қойыла ма? – деді депутат.

Өнеркәсіп және құрылыс министрі Ерсайын Нағаспаев жауап ретінде ел аумағының шамамен жартысы сейсмикалық қауіпті аймақта орналасқанын растады және жаңа кодекс осы тәуекелдерді ескеретінін айтты.

Шынында да елдің 45%-ы сейсмикалық қауіпті аймақтарда орналасқан. Кодексте сейсмикалық қауіпсіздікке арналған бөлек тарау бар. Енді сейсмозоналау мен тәуекел карталары енгізіледі. ТЖМ әзірлеген микрозоналау карталары бас және егжей-тегжейлі жоспарларды дайындау кезінде міндетті түрде қолданылады, – деді министр.

Оның айтуынша, бұл жаңа тәсілдер құрылыс нысандарының қауіп деңгейін дәлірек анықтауға және қауіпті жерлерде құрылыс жүргізуге жол бермеуге мүмкіндік береді.

Алматы мен басқа өңірлерде енді құрылыс жоспарлау кезінде осы карталар міндетті түрде ескерілетін болады, – деп қосты Ерсайын Нағаспаев.

Сонымен қатар ол сейсмикалық зонирлеуді нақтылау және жергілікті атқарушы органдарға арналған практикалық құралдар әзірлеу жұмысы жалғасып жатқанын айтты. Егер аймақ нақты қауіпті деп танылса, онда ол жерде құрылыс жүргізуге тыйым салынады.