«Біз жеп көрмеген ең дәмді нәрсе!»: Джей Лоның вокалисті мен оның отбасы Қазақстан шоколадына тамсанды

Әнші Дженнифер Лопестің танымал вокалисті Шэрон Янгблад Қазақстан туралы әсерлерімен бөлісуді жалғастырып жүр. Жуырда ол өз үйіне қазақстандық шоколад апарып, АҚШ-тағы туыстарын қонақ еткенін айтты, деп хабарлайды JANABASTAU.KZ ақпарат агенттігі Tengri Life-қа сілтеме жасап.

Әншінің айтуынша, ол Алматыдағы туры кезінде алғаш рет жергілікті тәттілерді татып көрген. Сол кезде жанкүйерлері оған бір қорап шоколад сыйлаған.

Егер мені бақылап жүрсеңіздер, онда білесіздер: менің және Қазақстан халқының арасында ерекше сүйіспеншілік пайда болды! Мен бұл елге де, оның халқына да ғашық болдым. Және соған жауап ретінде соншама жылылық пен қолдау алдым! Сол себепті сіздермен маған сыйға тартылған тәттілермен бөліскім келді. Қара шоколад – мен өмірімде жеп көрген ең үздігі! – деді Шэрон.

Айтуынша, ол тәтті сыйлық туралы туыстарының пікірін білгісі келген. Жарияланған бейнеде оның отбасы қазақстандық шоколадты татып көріп, өз әсерлерімен бөлісіп отыр.

О, Құдайым-ау, бұл керемет екен! Бұл біздің шоколадымызға ұқсамайды, мүлде басқа. Мен өмірімде жеп көрген ең жақсы қара шоколад! – дейді вокалистің туыстарының бірі.

Отбасының басқа мүшелері де бұған дейін мұндай дәмді татпағандарын айтты.

Бұл – біз жеп көрмеген ең дәмді нәрсе. Шынымен қатты ұнаттық! – дейді Шэронның досы.