«Мүгедектерді Алланың өзі жазалаған»: Дауға қалған шенеунік кешірім сұрады

Алматы облысы әкімінің бірінші орынбасары Қанат Есболатов Денсаулық сақтау министрі Акмарал Әлназарова қатысқан жиында айтқан сөзіне байланысты даудың ортасында қалды, деп хабарлайды JANABASTAU.KZ ақпарат агенттігі.

Әлеуметтік желілерде тараған видеода шенеуніктің:

Мүгедектігі бар адамдарды құрметтеңіздер, оларды Алла тағала онсыз да жазалаған, - деген сөзі анық естіледі.

Куәгерлердің айтуынша, бұл сөзден кейін залда абыржу пайда болып, артынша наразылық күшейген.

Кейін Қанат Есболатов көпшілік алдында өз сөзін сәтсіз жеткізгенін мойындап, кешірім сұрады.

Оның айтуынша, Талғар қаласында өткен кездесу жоспарланған екі сағаттың орнына төрт сағатқа созылып, мүгедектігі бар азаматтар ұзақ уақыт тікесінен тұруға мәжбүр болған. Сонымен қатар оларды бірнеше рет бөліп, сөздерін аяқтатпай қойған.

Шенеуніктің айтуынша, ол тәртіп орнатпақ болып, «мұндай жандардың өмірінде ауыр сынақтар бар екенін айтқысы келген», алайда ойын орыс тілінде дұрыс жеткізе алмаған.

Мен сөзім көптеген адамның сезіміне, тіпті намысына тиді деп түсінемін. Сол үшін шын жүректен кешірім сұраймын, – деді ол.