Qazaqstan Barysy-2025 чемпионы Grand Slam-дегі алғашқы белдесуде-ақ жеңіліп қалды

БАӘ-дегі Grand Slam кезеңі қазақстандық балуандар үшін сәтсіз өтіп жатыр, деп хабарлайды JANABASTAU.KZ ақпарат агенттігі 1bol.kz-ке сілтеме жасап.

100 келі салмақ дәрежесінде өнер көрсеткен «Qazaqstan Barysy-2025» турнирінің жеңімпазы Марат Байқамыров алғашқы белдесуінде-ақ Нидерланд спортшысы Симеон Катеринге жол берді.

Осы санатта күрескен тағы бір отандасымыз Нұрлыхан Шархан да бірінші кездесуінде Сербия балуаны Александар Куколден жеңілді.

+100 келі салмақта сынға түскен қазақстандық Еламан Ерғалиев те жарысты ерте аяқтады. Ол Бахрейн атынан сынға түсіп жүрген, бұрын Ресейдің намысын қорғаған балуан Азамат Чорчаевқа есе жіберді.

Әзірге Ермахан Әнуарбеков қана жарыс жолын жалғастырып отыр. Биылғы Азия чемпионатында 4-орын алған Әнуарбеков 1/8 финалда Әзербайжан спортшысы Аслан Коцоевті жеңіп, ширек финалға жолдама алды. Келесі қарсыласы – қазір Сербия құрамында бақ сынап жүрген бұрынғы ресейлік дзюдошы Ислам Шогенов.