Қазақстан СІМ Украинаның Каспий құбыр консорциумына үшінші рет шабуыл жасағанын айыптады

Қазақстанның Сыртқы істер министрлігі Каспий құбыр консорциумының Теңіз терминалына жасалған шабуылға қатысты ресми мәлімдеме жасады, деп хабарлайды JANABASTAU.KZ ақпарат агенттігі ведомствоның Telegram-арнасына сілтеме жасап.

Қазақстан Республикасының Сыртқы істер министрлігі Новороссийск теңіз порты акваториясындағы халықаралық Каспий құбыр консорциумының маңызды инфрақұрылымына жасалған кезекті әдейі шабуылға байланысты өз қарсылығын білдіреді, – делінген хабарламада.

Министрлік бұл оқиғаның «халықаралық құқықпен қорғалатын, тек азаматтық мақсаттағы нысанға жасалған үшінші шабуыл» екенін еске салды.

Жаһандық энергетикалық нарықтың жауапты қатысушысы ретінде Қазақстан энергоресурстардың тұрақты әрі үздіксіз жеткізілуін қамтамасыз ету ұстанымын ұстанады, – деп мәлімдеді ведомство.

Сондай-ақ Сыртқы істер министрлігі Каспий құбыр консорциумының әлемдік энергетикалық жүйенің тұрақтылығын сақтауда маңызды рөл атқаратынын атап өтті.

Біз бұл жағдайды Қазақстан Республикасы мен Украина арасындағы екіжақты қарым-қатынастарға зиян келтіретін әрекет деп бағалаймыз және болашақта мұндай оқиғаларға жол бермеу үшін украин тарапынан нақты шаралар күтудеміз, – делінген мәлімдемеде.

Еске сала кетсек, 29 қарашада Астана уақытымен 06:06-да Новороссийск порты маңындағы КТК теңіз инфрақұрылымына ұшқышсыз су көліктерімен шабуыл жасалған болатын. Соның салдарынан ВПУ-2 атты жылжымалы айлақ құрылғысы қатты зақымданды. Агрегат толық жөндеу және қалпына келтіру жұмыстары аяқталғанға дейін істен шыққан.