«Қоңырауға жауап бермейді»: Димаш Құдайбергенге іздеу салынды

«Қазақстан авторлық қоғамы» РҚБ-нің бас директоры Айнұр Есендікова 400-ден астам автор мен орындаушы, соның ішінде еліміздегі танымал жұлдыздар әлі күнге дейін өз әндері үшін авторлық қаламақыларын ала алмай жүргенін мәлімдеді, деп хабарлады janabastau.kz Orda.kz-ке сілтеме жасап.

Бұған себеп – қарапайым кері байланыстың болмауы.

«Авторлық және сабақтас құқықтар туралы заңға сәйкес біз авторлар мен құқық иелерін іздеп тауып, оларға тиесілі төлемдерді беруге міндеттіміз. Осы мақсатта біздің сайтта ресми тізім жарияланған – бұл заң талабы», – деп түсіндірді Есендікова брифинг барысында.

Ұйым қызметкерлері авторлармен барынша байланыс орнатуға тырысқанымен, әрдайым жауап ала бермейді екен.

«Кейбір орындаушылар жауап береді, бірақ түрлі қиындықтар да болады. Көбінің жеке менеджерлері немесе продюсерлері бар, олар бізді алаяқ деп ойлап, мүлде жауап қайтармайды. Бұл бүкіл процеске кедергі келтіреді», – дейді Есендікова.

«Біз мессенджерлер, Instagram, Telegram, WhatsApp арқылы жазамыз, қоңырау шаламыз. Бірақ, өкінішке қарай, көп жағдайда жауап болмайды. Сондықтан барлық құқық иелеріне үндеу жолдаймын: егер бізден хат алсаңыздар – міндетті түрде жауап беріңіздер. Біз шын мәнінде сіздердің ақшаларыңызды бергіміз келеді», – деп қосты KazAK басшысы.

Бұған дейін қоғам назарын тізімдегі кейбір орындаушылардың байланыс деректері ашық қолжетімді бола тұра «іздеуде» жүргеніне аударған болатын.

2024 жылы жарияланған бұл тізімде 421 автор бар. Олардың қатарында Димаш Құдайберген, Әли Оқапов, Иманбек, Darkhan Juzz, Қайрат Нұртас, Raim & Artur, Rin’Go, Садраддин, Say Mo, Son Pascal, M’Dee, V$XV PRiNCE, Ғалымжан Молданазар және басқалар бар. Тізімге шетелдік орындаушылар да енген.