«Құжаттарды кабинетінен алып кетіп жүрдім»

Алматы қаласының Алмалы аудандық сотында «ҚазТрансГаз» басшысының бұрынғы кеңесшісі әрі «Нұр Отанның» бұрынғы идеологы Санжар Боқаевқа қатысты қылмыстық іс бойынша сот жалғасып жатыр, деп хабарлайды JANABASTAU.KZ ақпарат агенттігі

 27 қазанда өткен сот отырысында «ҚазТрансГаз» кәсіподағының бұрынғы төрайымы Зәуреш Маханова жауап берді. Ол Боқаевтың өзіне бағынышты компаниялар арқылы қаражат шығаруды жеке өзі қалай бақылағанын егжей-тегжейлі баяндады.

Кәсіподақ құрылған сәттен бастап, яғни 2017 жылдан бері оны басқарған Маханова сотта автошеру ұйымдастыру үшін «BM Trust» және «We Can» компанияларын тарту бастамасын Боқаевтың өзі көтергенін растады. Куәгердің айтуынша, ол екі ұйымның да құжаттарын қол қою үшін жеке өзі әкелетін. Сот отырысының хаттамасына түрлі сомалар көрсетілген екі сметасы бар қызметтік жазба қоса тіркелген.

Жауап алу барысында мемлекеттік айыптаушы іс-шара бюджетін неліктен жасанды түрде екі келісімшартқа бөлу туралы шешім қабылданғанын төтесінен сұрады. Куәгер басты фигуранттың жиені Мадияр Қалменов оған сандары алдын ала жазылған дайын келісімшарттарды әкелгенін ашып айтты.

Маханованың айтуынша, кәсіподақ комитетінің хаттамасында автошеруді өткізуге жауапты тұлға ретінде нақ осы Санжар Боқаев көрсетілген. Оның тарапынан болған толық бақылауды тағы бір деталь дәлелдейді – куәгер орындалған жұмыстардың жабу актілерін тікелей Боқаевтың жеке кабинетінен алып отырған. Сондай-ақ, Маханова «We Can» фирмасының орындалған жұмыс актілерін Қалменов немесе Боқаевтың өзі әкелгенін қосты. Кәсіподақ комитетінің отырыстарында басқа тұлғалар да өз компанияларын мердігер ретінде ұсынуға құқылы болған, алайда іс жүзінде басқа ешкімнен мұндай ұсыныстар түспеген.

Зәуреш Маханованың жауаптары алдыңғы куәгер – кәсіподақ комитетінің хатшысы Мұхтар Әмірхановтың сөздерін растайды. Өткен отырыста ол Боқаевтың өз жиеніне бағынысты «BM Trust» компаниясын жалдауды өзі ұсынғанын атап өткен. Мемлекеттік айыптаушының мәліметінше, бұл схема кәсіподақтан 42 миллион теңгені жымқыруға мүмкіндік берген, кейіннен бұл қаражат Боқаевтың жиһаз бизнесі арқылы заңдастырылған.

Естеріңізге сала кетейік, «ҚазТрансГаз» бас директорының бұрынғы кеңесшісі Санжар Боқаев Қылмыстық кодекстің бірден бес бабы бойынша айыпталып отыр: аса ірі мөлшердегі алаяқтық, қылмыстық кірістерді заңдастыру, ұрлық, ағаштарды заңсыз кесу және көрінеу жалған ақпарат тарату. Оның жиені Мадияр Қалменовке алаяқтық пен ақшаны жылыстатты деген айып тағылса, жеке мобилографы Ұлан Нүсіпқожаға ұрлық, ағаштарды кесу және жалған мәліметі бар контент тарату айыбы тағылған.