Радикализмге қарсы иммунитет: қоғамды қорғайтын ішкі тосқауыл

Қазіргі жаһандану дәуірінде терроризм мен экстремизм қаупі ұлттық шекарамен шектелмейтін күрделі құбылысқа айналды. Ақпараттық кеңістіктің ашықтығы, әлеуметтік желілердің ықпалы радикалды идеологиялардың таралуын жеңілдетіп отыр. Сондықтан бұл қауіпке күштік құрылымдармен қатар тұтас қоғам қарсы тұруы керек, деп хабарлайды JANABASTAU.KZ ақпарат агенттігі.

Қазақстанда терроризм мен экстремизмнің алдын алу бағытында жүйелі жұмыстар жүргізіліп жатыр, әрине. Мемлекеттік деңгейде арнайы бағдарламалар қабылданып, ақпараттық-түсіндіру топтары құрылды. Десе де діни сауаттылықты арттыру, жастармен жұмыс істеу, күмәнді идеологиялардың алдын алу – негізгі басымдықтардың бірі.

Алайда, тәжірибе көрсеткендей, ең тиімді қорғаныс – бұл қоғамның ішкі иммунитеті. Яғни, әр адам сыни ойлай алуы, ақпаратты сараптай білуі және радикалды идеяларды дер кезінде ажырата алуы керек. Бұл қабілет бір күнде қалыптаспайды, ол білім мен тәрбие арқылы дамиды.

Әсіресе, жастар басты нысанаға алынған. Себебі олар жаңа идеяларға ашық, бірақ кейде тәжірибесіз келеді. Сондықтан білім беру жүйесінде медиасауаттылық, діни таным және құқықтық мәдениетке ерекше мән берілуі тиіс деп ойлаймыз. Отбасы институтының да рөлі зор. Баламен ашық сөйлесу, оның қызығушылықтарын бақылау – қауіптің алдын алудың қарапайым, бірақ тиімді жолы.

Сарапшылар радикализмнің алдын алуда тыйым салудан гөрі түсіндіру жұмыстарының тиімді екенін айтады. Себебі қысым әрдайым кері әсер беруі мүмкін. Ал сенімді диалог, нақты дәлелдер мен өмірлік мысалдар адам санасына тереңірек әсер етеді.

Терроризм мен экстремизмге қарсы күрес тек қауіптің салдарымен емес, оның себептерімен жұмыс істеуді талап ететіні белгілі. Ал қоғамның радикалды идеологиядан қауіпсіз әрі тұрақты болуы үшін қарсы иммунитет қалыптастырған жөн.