Референдум: Қонаев қаласында ретрокөліктер шеруі өтті

15.03.26 сағат 10:52 Жаңалықтар

Фото: Алматы облысы әкімдігі

Қонаев қаласының Құрметті азаматы, белгілі кәсіпкер Мұрат Сіргебаев республикалық референдум күні ерекше бастама көтеріп, ретрокөліктерден құралған автошеру ұйымдастырды, деп хабарлайды JANABASTAU.KZ ақпарат агенттігі.

Қала көшелерімен жүріп өткен сәні келіскен көне автомобильдер көпшіліктің назарын аударды. Сирек кездесетін ретрокөліктерді көрген тұрғындар қызыға қарап, суретке түсіп, ерекше әсер алды. Көпшілік үшін бұл күн тек маңызды саяси оқиға ғана емес, сонымен бірге көтеріңкі көңіл күй сыйлаған мерекелік сәтке айналды. Осылайша, Қонаев қаласында жағымды, позитивті атмосфера қалыптасты.

Айта кету керек, Мұрат Сіргебаев – қалада өз кәсібін табысты жүргізіп отырған ірі кәсіпкерлердің бірі. Ол қайырымдылық шараларына белсенді қатысып, шаһардың қоғамдық өміріне тұрақты түрде үлес қосып келеді. Сонымен қатар қаладағы ерекше нысандардың бірі – ретрокөліктер музейінің негізін қалаған.

Елге сіңірген еңбегі мен қоғамдық белсенділігі үшін ол Қонаев қаласының Құрметті азаматы атағына ие болған.

Ол қалалық Мәдениет үйінде орналасқан №949 референдум учаскесіне ретро көліктермен шерулетіп келіп, өз таңдауын жасады.

Бүгін референдум өтуіне орай халықтың көңіл күйін көтеру мақсатында автошеру ұйымдастырдық. Біз бұған дейін де қалада өткен түрлі шараның ешқайсысынан қалыс қалмай, шама-шарқымызша атсалысып жүрміз. Осы жолы референдумға белсене қатысып жатырмыз. Бүгінгі шара барысында Әжелер ансамблі мен бір топ өнерпазды ретро көлікке мінгізіп, барлық учаскелерді аралап шығамыз. Олар референдум учаскелерінің алдында өз өнерлерін ортаға салады, - деді ол.