Салымшыларға ақшалары қайтарылады: Қазақстанда қай банктер таратылып жатыр

Қазіргі уақытта тоғыз екінші деңгейлі банк таратылу процесінде тұр, деп хабарлайды JANABASTAU.KZ ақпарат агенттігі digitalbusiness.kz сайтына сілтеме жасап.

Таратылып жатқан қаржы ұйымдарының тізіміне «Валют-Транзит Банк», «Казинвестбанк», Delta Bank, Qazaq Banki, «Эксимбанк Казахстан», Банк Астаны, Tengri Bank, AsiaCredit Bank және Capital Bank Kazakhstan кіреді. Бұл банктер бойынша өтемақы төлеу мерзімі аяқталған, ал талап етілмеген қаражат ЕНПФ-тағы салымшылардың жеке зейнетақы шоттарына аударылды. Дегенмен өтемақы алу үшін белгіленген мерзімді өткізіп алған, бірақ оған «дәйекті себептері» бар салымшылар өтініш беруге әлі де мүмкіндік алады.

Айта кетейік, Қазақстанның депозиттерге кепілдік беру қоры (КДКҚ) «құрметті себептер» бойынша өтемақы төлеуге арналған өтініштерді қабылдауды жалғастырып жатыр. 2025 жылғы 1 наурыздағы жағдай бойынша қор 40 салымшыға 60 млн теңгеден астам қаржы төлеген. Қаражат салымшылардың жеке өтініштерін қарау нәтижесінде және мерзімді өткізіп алуға қатысты дәлелді құжаттар ұсынылғаннан кейін ғана берілген. Мұндай себептерге мыналар жатады:

әскери қызметке шақырылу;

Қазақстаннан тыс жерлерде болуы;

мұрагерлік рәсімдеу;

бас бостандығынан айыру орындарында болуы;

сот белгілеген өзге де мән-жайлар.

Өтемақы алуға құқығын дәлелдеу үшін әрбір себепті растайтын тиісті құжаттарды ұсыну қажет. Мысалы, әскери қызмет бойынша – қызмет өткергенін растайтын құжат, ал елден тыс жерде болу үшін – шекарадан өткенін растайтын белгісі бар паспорт қажет.

Маңыздысы – барлық құжаттар салымшыға өтемақы алу үшін өтініш беруге кедергі болған жағдайлардың үздіксіз болғанын дәлелдеуі тиіс. Бұл мерзім банк лицензиясынан айырылған күннен бастап 1 жылды құрайды. Салымшылар өтінішті КДКҚ-ға жеке барып немесе пошта арқылы жіберіп, өтінішке нотариалды куәландырылған қолтаңбасын және жеке басын куәландыратын құжаттың көшірмесін қоса тапсыра алады.

Қор келіп түскен өтініштерді бес жұмыс күні ішінде қарайды. Егер өтініш қанағаттандырылса, қаражат салымшының банктік шотына аударылады. Бас тартылған жағдайда қор бас тарту себептерін толық түсіндіреді және кемшіліктерді түзету бойынша ұсыныстар береді.

Салымшылардың абсолют басым бөлігі өз ақшасын қайтарып алған. Бұл – 148 мың адам, олар 113 млрд теңгеден астам қаржы алған. Бұл жалпы міндеттемелердің 98 пайызы.

Өтемақы мәселелері бойынша КДКҚ-ның 1460 қысқа нөміріне немесе мамандардың мына байланыс нөмірлеріне хабарласуға болады:
+7 (727) 312-24-49, 312-24-41.