Түркияда 1 қарашадан бастап 15 жасқа толмаған балаларға әлеуметтік желілерді пайдалануға тыйым салынады

2026 жылғы 1 қарашадан бастап Түркияда 15 жасқа толмаған балалардың әлеуметтік желілерді пайдалануына тыйым салынады. Тиісті ереже 10 қазанда республиканың ресми басылымы Resmî Gazete газетінде жарияланды.

Әлеуметтік желі платформалары пайдаланушылардың жасын тіркеу кезінде мемлекеттік e-Devlet порталы арқылы тексеруге міндеттеледі. Белгіленген жасқа толмаған балалардың аккаунт ашуына жол берілмейді.

15 жастан асқан жасөспірімдерге де бірқатар шектеулер енгізіледі. Олардың аккаунттары жабық болуы тиіс, ал хабарламаларды тек өздеріне жазылған пайдаланушылардан ғана ала алады. Сонымен қатар жасөспірімдерге тікелей эфир жүргізуге, жекелендірілген жарнамалар мен басқа аккаунттардың ұсыныстарын алуға, сондай-ақ телефон кітапшасындағы және өзге де сервистердегі контактілерді синхрондауға тыйым салынады.

Бұдан бөлек, әлеуметтік желілер ата-аналар мен қамқоршыларға балалардың интернеттегі белсенділігін бақылауға арналған құралдарды ұсынуы керек. Ересектер балалардың профиль баптауларын басқарып, платформаларды пайдалану уақытына шектеу қоя алады және ақылы операцияларды растау мүмкіндігіне ие болады.