Жарлық шықты: Қырғызстан экс-президенті барлық марапатынан айырылды

Қырғызстанның экс-президенті Алмазбек Атамбаев барлық мемлекеттік марапаттарынан айырылды. Тиісті Жарлыққа Қырғызстан Президенті Садыр Жапаров қол қойды, деп хабарлайды JANABASTAU.KZ ақпарат агенттігі.

Ресми құжатта бұл шешім 2025 жылғы 3 маусымда Бішкектің Бірінші Май аудандық соты шығарған үкімді орындау мақсатында қабылданғаны көрсетілген. Сондай-ақ Қырғыз Республикасының "Мемлекеттік наградалар, құрметті атақтар және мемлекеттік сыйлықтар туралы" заңының 27-бабының 1, 2 және 4-бөліктеріне, сондай-ақ ел Конституциясының 71-бабына сүйенілген.

Жарлыққа сәйкес, Алмазбек Атамбаев мына мемлекеттік марапаттарынан айырылды:

• Қырғыз Республикасының ең жоғары айрықша дәрежесі – "Кыргыз Республикасынын Баатыры" атағы;
• "Манас" орденінің II дәрежесі;
• "Данакер" ордені;
• "Данк" медалі.

Сонымен қатар осы марапаттарды беру туралы бұрын қабылданған президенттік жарлықтардың күші жойылды. Атап айтқанда, 1999, 2007, 2011 және 2017 жылдары қабылданған бірқатар Жарлық ресми түрде кері қайтарылды.