Жетісулық жігіт әйелін 2-ге толмаған қызының көзінше азаптап өлтірген

Жетісу облысында 32 жастағы Айзат Жұманованы азаптап өлтірді деп айыпталған күйеуінің ісі сотқа жетті, деп хабарлайды JANABASTAU.KZ ақпарат агенттігі 31 арнаға сілтеме жасап.

Арнаның хабарлауынша, жігіттің ішімдікке сылқия тойып алып, зайыбына асқан қатыгездікпен ажал құштырғаны тергеу барысында дәлелденген. Прокурордың мәліметінше, айыпталушының қанды қылмысқа баруына қызғаныш себеп болған. Айта кетсек, бұған дейін марқұмның туыстары қаскөйдің әйелді атпен сүйреп қинағанын айтқан еді.

Прокурордың мәліметінше, 33 жастағы жігіт әйелінің телефон арқылы бөтен адаммен сөйлескенін көріп, қызғанышқа салынған. Әйелдің айғайлап көмек сұрағанына қармастан, жұдырықтауын тоқтатпаған. Сорықысы, бұл қылмыс 2-ге толмаған кішкентай қызының көзінше жасалған.

Ашуланған Айбар Жанболат мотоциклге отырып, Суықсай ауылындағы дүкенге барып, 7-8 бөтелке сыра сатып алған. Жол бойы сатып алған сыраны ішкен. Үйге келген соң Жұманованың белгісіз біреумен телефон арқылы сөйлесіп жүргені есіне түсіп, қызғаныш сезімі оянып, әйелін өлтіруді ойлаған, - дейді Жетісу облысының прокуроры Нұрлан Билібеков.

Жалпы, ерлі-зайыптының арасы бұрыннан суып кеткен. Олар бір-бірінің телефонын сындырып, 15 күн байланыссыз жүрген. Осы уақыт аралығында өзара сөйлеспеген дейді мемлекеттік айыптаушы. Ал әйелді атпен сүйреді деген туыстарының болжамы тергеу барысында расталмады. Сондай-ақ жәбірленуші тараптың наразылығынан кейін мәйітке эксгумация жасалып, нәтижесінде қылмыс «қасақана өлтіру» дерегіне ауысқан.

Белгілері болғандықтан, жараларына қарадық. Бастың арасы – шөп, қоқым. Соған қарап, біз оны атпен сүйреп өлтірді дегенбіз. Ол мойындаған жоқ. Енді мойындасын, мойындамасын – әркімнің конституциялық құқығы. Бірақ біз енді оны осы уақытқа дейін дәлелдеп келдік. Қорғаушыларымыздың, резонанстың арқасында біздің ісіміз 99-баптың 1-бөлігіне алып келді, - дейді марқұмның туысы Раушан Дәуренбекова.

Қара жамылған отбасы айыпталушының қолымен жасағанын мойнымен көтере алмағанына қапалы. Олар кінәлі адамның қатаң жазаланғанын қалайды.

Еске сала кетсек, қанды оқиға шілде айында болған. Жақындары Айзат Жұманованың мәйітін көрсетіп, күйеуі асқан қатыгездікпен өлтіргенін айтқан болатын. 32 жасында көз жұмған келіншек 3 жыл бұрын тұрмысқа шыққан екен. Артында 2 жасар қызы қалды.