«Адамша ойланатын» жасанды интеллект: Илон Маск Grok 3-ті таныстырды

Илон Масктың xAI компаниясы жаңа буындағы жасанды интеллект Grok 3-ті ресми түрде таныстырды. Маск бұл жүйені әлемдегі ең ақылды құрал деп атап, оның есептеу қуаты алдыңғы нұсқамен салыстырғанда он есе артқанын мәлімдеді, деп хабарлайды JANABASTAU.KZ

Жаңа Grok 3 OpenAI-дің ChatGPT, Қытайдың DeepSeek сияқты алпауыт өнімдерімен бәсекелесуге дайын. Маск бұл технологияны әлемді тануға және шындықты іздеуге бағытталған құрал ретінде сипаттап:

«Grok – Ғаламды тану үшін жасалған», – деп мәлімдеді.

Масктың саяси ықпалы мен технологиялық жаңалықтар

Grok 3-тің таныстырылымы Иллон Масктың АҚШ-тағы саяси ықпалы күшейген кезеңмен тұспа-тұс келді. Ол президент Дональд Трамптың жақын серіктестерінің бірі ретінде федералды агенттіктердің реформасына қатысып жатыр. Бұл реформалар АҚШ-тың мемлекеттік шығындарын қысқартуды көздейді, алайда кейбір сарапшылар бұл процестің Масктың жеке бизнесіне әсер етуі мүмкін екенін алға тартуда.

Презентация барысында Маск:

«Біздің жасанды интеллект ақиқатты іздеуге бағытталған, ол кейде жалпыға ортақ пікірлер мен саяси дұрыстыққа қайшы келуі мүмкін», – деп атап өтті.

Grok 3-тің ең басты артықшылығы – оның аналитикалық қабілеттерінің күшеюі және синтетикалық деректерде үйретілуі. Бұл тәсіл жүйенің жалған ақпарат таратуын (т.с.с. «галлюцинация» проблемасын) азайтуға бағытталған.

Масктың айтуынша, Grok 3 жүргізілген тесттерде қазіргі уақытта қолжетімді барлық ашық модельдерден асып түскен. Бұл жаңалықты ол Дубайда өткен Дүниежүзілік үкімет саммитінде жариялады.

Grok 3-ті кімдер пайдалана алады?

Grok 3-ті алғашқы болып X (бұрынғы Twitter) әлеуметтік желісінің Premium+ жазылымына ие қолданушылар пайдалана алады. Кейіннен бұл мүмкіндік кеңейтіледі.

Алдын ала тестілер нәтижесінде Chatbot Arena рейтингінде Grok 3 барлық қолданыстағы чат-боттардан жоғары орын алған.

Қарқынды бәсеке: Маск пен Альтман текетіресі

Grok 3 нарыққа Қытайдың DeepSeek сияқты жасанды интеллект өнімдерімен күресу үшін шықты. DeepSeek R1 моделінің сапасы жоғары және оның құны төмен болғандықтан, бұл АҚШ-тың технологиялық үстемдігіне тікелей қауіп төндіруде.

Сонымен қатар, Масктың OpenAI-дің бас директоры Сэм Альтманмен қарым-қатынасы ұзақ уақыттан бері шиеленісіп келеді. 2015 жылы OpenAI-ді құрушылардың бірі болған Маск кейін жобадан шығып, 2022 жылы OpenAI-дің ChatGPT жетістіктері оны бәсекеге түсуге мәжбүр етті.

Осы жылы Маск OpenAI-ді 100 миллиард долларға сатып алу туралы ұсыныс жасаған, алайда компанияның директорлар кеңесі бұл ұсыныстан бас тартқан.

Трамп, Маск және АҚШ-тың жасанды интеллект стратегиясы

Дональд Трамптың екінші президенттік мерзімінде АҚШ-тың технологиялық стратегиясында ИИ (жасанды интеллект) ерекше орынға ие болды. Ақ үй Маскты мемлекеттік басқарудың тиімділігін арттыру жөніндегі жаңа агенттікке (DOGE) жетекшілік етуге шақырды.

Bloomberg деректері бойынша, xAI қазіргі уақытта 10 миллиард доллар инвестиция тарту бойынша келіссөздер жүргізіп жатыр, ал компанияның нарықтық құны 75 миллиард долларға жетуі мүмкін.

Илон Масктың 2023 жылы OpenAI-дің қауіпті дамуына алаңдаушылық білдіріп, дамуды уақытша тоқтатуға шақырғанын ескерсек, оның қазіргі жасанды интеллект нарығындағы белсенділігі қызықты парадокс тудырады. 

Grok 3 – Масктың OpenAI мен басқа бәсекелестерге қарсы қойған жаңа қаруы. Ол аналитикалық қабілеті мен шындықты іздеуге бағытталған моделін алға тартып, нарықта басымдыққа ие болуға ұмтылады. Алайда, Масктың саяси ықпалы, Трамппен байланысы және xAI-дың болашақ стратегиясы технологиялық және саяси аренада үлкен өзгерістерге алып келуі мүмкін.