АҚШ украиналықтардан елден күтпеген жерден кетуді талап етті

АҚШ президенті Дональд Трамптың әкімшілігі елде заңды түрде тұрып жатқан украиналықтарға ел аумағынан кету туралы талап қойылған хаттарды қателесіп жіберді, деп хабарлайды JANABASTAU.KZ. Deutsche Welle агенттігі Reuters-ке сілтеме жасап.

Мұндай электронды хабарламаларды осы аптада гуманитарлық бағдарламалар аясында АҚШ-та тұрып жатқан бірнеше украин азаматы алған.

АҚШ-тың Кедендік және шекаралық қызметі атынан жіберілген хаттарда украиналықтардың елде тұру рұқсаты жойылғаны және олардың елден кету үшін 7 күні бар екені айтылған. Хаттарда егер бұл талап орындалмаса, "федералды үкімет оны бұзғандарды тауып алады" деген қауіп те болған.

"Егер сіз АҚШ аумағынан дереу кетпесеңіз, сізге қатысты елден мәжбүрлеп шығару шаралары қолданылуы мүмкін. АҚШ-та қалуға тырыспаңыз", – делінген украиналықтарға жолданған хабарламада.

БАҚ-та мұндай хаттарды қанша адам алғаны туралы нақты дерек жоқ. Алайда, АҚШ Ішкі қауіпсіздік министрлігі (оның құрамына Кедендік және шекаралық қызмет те кіреді) бұл хаттарды жіберу қателік болғанын мәлімдеді.

Министрлік 4 сәуірде жасаған мәлімдемесінде, 2022 жылы Ресейдің Украинаға жаппай басып кіруінен кейін іске қосылған украиндарды қабылдау бағдарламасы әрі қарай жалғасып жатқанын атап өтті. Бұл бағдарлама аясында АҚШ 240 мың украин азаматын қабылдаған.