Атырау облысында бір отбасының жоғалуы: қаза тапқан зейнеткерлердің қызы да күдікке ілінді

Ішкі істер министрінің орынбасары Санжар Әділов мәжіліс кулуарында Атырау облысында жоғалған отбасы ісіне қатысты пікір білдірді, деп хабарлайды JANABASTAU.KZ ақпарат агенттігі.

Естеріңізге сала кетейік, кеше ІІМ-нің баспасөз қызметі Индонезияның Ломбок аралындағы Сенару ауылында Атырау облысында аса ауыр қылмыс жасады деп күдікке ілінген ер адамның ұсталғанын хабарлаған еді. Онымен бірге бұған дейін хабар-ошарсыз кетті деп халықаралық іздеуге жарияланған бұрынғы жұбайы да анықталған.

Санжар Әділовтің айтуынша, олар жақын арада Қазақстанға жеткізіледі.

"Оларды Қазақстан Республикасына қайтару мәселесі шешіліп жатыр. Жұбайлардың екеуі де күдікті. Із-түссіз жоғалып кеткен екі адамды іздеу жалғасуда. Атырау облысында арнайы топ жұмыс істеп жатыр", - деді ішкі істер министрінің орынбасары.