Атыраудағы жын шығару сәтінің видеосын полиция тексеріп жатыр (видео)
165
видео кадры
Әлеуметтік желілерде Атырауда өзін емші деп таныстырған ер адамның тоғыз жастағы қыздан жынды шығару рәсімін жасағаны көрсетілген бейнеролик тарады. Қоғамда үлкен резонанс тудырған бұл бейнежазбаға Қазақстандағы бала құқықтары жөніндегі уәкіл Динара Закиева назар аударды, - деп хабарлайды JANABASTAU.KZ Tengrinews.kz тілшісіне сілтеме жасап.
Бейнероликте еденде жылап жатқан қызды екі ер адам ұстап тұрғаны және олардың бірі қызға сұрақтар қойғаны түсірілген. Видео жазбада тоғыз жастағы қызға Ляззат есімді 19 жастағы қыздың рухы енгені айтылған.
Қазнетте жарияланған роликке қазақстандықтар наразылық білдірді.
"Қорқынышты, бұл орта ғасыр ма? Қандай жын шығару? Қандай рәсім? Бейшара қыз, жылап жатыр", "Бұл не? Қыз өмір бойына жарақат алатын болды", - деп пікір қалдырды адамдар.
Қазақстандағы бала құқықтары жөніндегі уәкіл Динара Закиева да Instagram-парақшасында видеоға қатысты өз пікірін білдірді.
"Бұл оқиға бойынша ІІМ, өңірлік уәкілдермен жұмыс істеп жатырмыз. Алдын ала емшінің кім екенін және баланың қайда екенін анықтадық. Ақпарат тексеріліп, барлық жағдай анықталып жатыр", – деп жазды ол.
Атырау облысындағы бала құқықтары жөніндегі уәкіл Айжан Сарсембаева "Ақ Жайық" газетіне берген сұхбатында қыздың Алматы қаласында тұратынын, сондықтан бұл іс Алматы облысындағы уәкілдің қарауында екенін мәлімдеді.
"Қазіргі уақытта емшінің Атырау облысында тұратыны белгілі, бірақ ол ел аумағында гастрольдік сапарлармен қызмет көрсетеді", – деп қосты ол.
Құқық қорғау органдары емшімен әңгіме өткізгені белгілі. Алайда ол қыздың есімі мен тегін есіне түсіре алмады, өйткені ол оның көптеген "науқастарының" бірі ғана болған.
Пікірлер (0)