Достығымызды сақтай білген елміз

Қазір Қазақстанның бейбітсүйгіштік позициясы, әлемді ынтымақтастыққа жиі шақырған бастамалары және дінаралық татулыққа үндеуі алпауыт мемлекет басшылары санасатын деңгейде. Осы ұстаныммен жаһандық саясат сахнасынан дүниені дүрмекке айналдырған басқыншылық, лаңкестік әрекеттерді қатаң айыптайтын өзіндік үніміз батыл шыға бастады. Соның бір айғағы ретінде халықаралық жиындар мен үлкен форумдардың еліміздің тікелей бастамасымен ұйымдастырылып жатқанын алға тартуға болады, деп хабарлайды JANABASTAU.KZ ақпарат агенттігі.

Әрине, әлемдегі бейбітшілікті сақтауға бағытталған саяси ірі қадамымыз ретінде алдымен өз еркімен ядролық қарудан бас тартып, Семей полигонын жапқанымызды айрықша айта аламыз.

Екіншіден, Сирия дағдарысы бойынша басты келіссөздердің Астанада жүргізілгені де зор жетістік.

Үшіншіден, Президент Қасым-Жомарт Тоқаев Түркі мемлекеттері Парламенттік ассамблеясына мүше елдер парламенттерінің спикерлерімен кездесуінде Көктүріктер ұрпағының бірлігін ептеп нығайта беру керектігін әдемі жеткізді.

«Қазір Парламенттік Ассамблея аясындағы бірлескен күш-жігеріміздің арқасында түркі ынтымақтастығы жылдан жылға нығайып келе жатыр. Бұл – өте жақсы үдеріс. Себебі тұтас түркі жұртының халықаралық беделі мен ықпалы да арта түсті. Бастысы, елдеріміздің арасында өзара жақындасуға деген талпыныс бар. Қазақстан алдағы уақытта да түбі бір түркі халықтарының жан-жақты ынтымақтастығын дамыта беруге мүдделі», - деді сонда мемлекет басшысы.

«Жақсы сөз – жарым ырыс». Сақтан қалған салты мен Ғұннан қалған ғұрпын сақтап келген бауырлас елдердің бірлігі бекем, тұғыры берік болса, алда аса алмайтын асу қалмас. Осы жағын бір пысықтап алған президентіміз БҰҰ-ның басшылық құрамымен өткізген кездесуінде тағы да көрегендік танытты. Нақты айтқанда, ол геосаяси тұрақсыздық өрши бастаған мына кезеңде осы бір халықаралық ұйым өзінің әмбебап әрі баламасыз сипатын сақтап, бейбітшілік, қауіпсіздік және дамуды қамтамасыз ету ісіндегі бірегейлігін сақтап қала беретініне зор сенім білдірді.

«Біздің ортақ міндетіміз – БҰҰ-ның жаһандық қауіпсіздікті қамтамасыз ететін, ХХІ ғасыр сын-қатерлеріне тиімді қарсы тұра алатын басты халықаралық институт ретіндегі рөлін күшейту. Қазіргі заманның түрлі проблемасына қатысты ортақ ұстанымның жаршысы ретінде «ШЫҰ дауысы» халықаралық аренада қаттырақ естілуі керек және солай болуға тиіс. Сондықтан біз қабылдаған тату көршілік, сенім және ынтымақтастық қағидаттары туралы мәлімдеме өте өзекті», – деді Қасым-Жомарт Тоқаев.

Сондай-ақ биыл Астанада өткен форумда әлемнің жаппай дамудың жаңа кезеңіне қадам басқаны ашық айтылды. Онда да кәнігі дипломатқа тән дегдарлықтан танбаған Қасым-Жомарт Тоқаев қазақ елінің «идеяның кені, араағайындық шешімдердің архитекторы және түрлі өңірлер мен мәдениеттердің серіктесі» ретінде дамудың даңғылын салуға өз үлесін қосуға дайын екенін жеткізді. Сонымен қатар әлемдегі басты қайшылықтардың түйінін ұжымдық күш-жігер мен парасатты дипломатия арқылы ғана тарқатып, дүниежүзінде ұзақмерзімді тұрақтылықты қамтамасыз етуге болатынына сенімі кәміл.

«Бүгінде әлем бұрын-соңды болмаған геосаяси қайшылықтар мен қақтығыстардың күшеюіне байланысты туындаған күрделі сынақтармен бетпе-бет келіп отыр. Халықаралық қауіпсіздіктің архитектурасына қауіп төніп тұр. Тұтас адамзат үшін оның зардабы ауыр болуы мүмкін. Осындай сын сағатта бізге өңірлік және жаһандық деңгейдегі ұжымдық күш-жігер арқылы бейбітшілікті, тұрақтылық пен қауіпсіздікті нығайту үшін орасан зор жауапкершілік жүктеліп отыр», – деді Қазақстан президенті Шанхай ынтымақтастық ұйымына мүше мемлекеттер басшылары кеңесінің отырысынан кейінгі саммитте.

Лайым ол жауапкершілікті де абыроймен алып жүруге жазсын!

Ерік ЕЛЕУСІЗ