Енді WhatsApp-тағы кез келген хат алмасу құжатқа айналады
22
Фото: pixabay
Қазақстанда тұтынушыларды қорғау туралы жаңа заң жобасында маңызды норма пайда болды: мессенджерлердегі жазбаша келісімдер сатушы мен сатып алушы арасындағы шарттың толық бөлімі ретінде танылады, деп хабарлайды JANABASTAU.KZ ақпарат агенттігі.
Мұндай өзгеріс енгізілетіні жөнінде Мәжіліс депутаты Мұрат Әбенов Instagram желісіндегі тікелей эфирінде айтты. Ол сатушы келісімшартта жазылмағанын сылтау етіп, өз уәдесінен бас тартуына жол берілмейтінін түсіндірді.
Біз мұны келісімшартқа міндетті түрде енгіздік, әсіресе, онлайн қызметтерде. WhatsApp-тағы кез келген сөйлесу, видеожазба, жарнама — бұлардың барлығы келісімнің бөлігі болады. Мысалы, Kaspi арқылы сөйлесіп, сен (сатушы) үш жыл кепілдік беремін дедің – оның бәрі келісім болып есептеледі. Хат алмасудың барлығы шартқа енгізіледі, – деп атап өтті Әбенов.
Ұсынылған норма азаматтардың құқығын қорғауға бағытталған. Бұл бизнеске өз пайдасына шартты өзгертіп, жауапкершіліктен жалтаруға мүмкіндік бермеу үшін жасалып отыр.
Біз бұны әдейі енгізіп отырмыз, себебі азамат қорғалуы тиіс. Көріп жүрміз: компанияларда мықты заңгерлер бар, ал адамдар қорғансыз, – деді депутат.
Бұл өзгеріс сатушылардың орындалмаған уәделері үшін жазаны күшейтеді. Мұрат Әбеновтің айтуынша, бизнес үшін келісімді бұзу тиімсіз болуы керек.
Пікірлер (0)