Газадағы атысты тоқтату келісімі күшіне енді

Газа секторындағы Израиль мен Палестина күштері арасындағы атысты тоқтату туралы келісім 10 қазан күні жергілікті уақыт бойынша түс кезінде  (Астана уақыты бойынша 14:00) күшіне енді, деп хабарлайды JANABASTAU.KZ ақпарат агенттігі.

Бұл туралы Израиль қорғаныс күштері (IDF) мәлімдеді.

Келісім күшіне енгеннен кейін 72 сағат ішінде тірі және өлі израильдік тұтқындар босатылады.

Израиль Премьер-министрінің кеңсесі Газада қалған кепілге алынғандарды қайтаруды жоспарлаған операцияны «Шекараға оралу» деп жариялады.

Өз кезегінде Израиль өмір бойына бас бостандығынан айырылған 250 палестиналық тұтқынды, сондай-ақ соғыс кезінде түрмеде отырған қосымша 1700 газалықты босатуы керек.

24 сағат ішінде Израиль күштері Газа секторының бірнеше аймағынан («Сары сызық» деп аталатын) оңтүстігіндегі Хан Юнистен солтүстіктегі Бейт-Лахияға дейін шығарылады деп жоспарланған.

Келісімнің бірінші кезеңі бойынша Израиль «сары сызық» аймағына шегініп, Газа аумағының 58 пайызын сақтап қалады.

Келісімнің ХАМАС-ты қарусыздандыру және Израиль әскерлерін Газадан толық шығаруды қамтитын кейінгі кезеңдері әлі келісілген жоқ.