Көкшетау оқушыларына экологиялық тәрбие берілуде

Көкшетау қаласының жалпы білім беретін мектептерінде оқушылар мен педагогтердің экологиялық мәдениетін қалыптастыру бағытында жүйелі жұмыстар жүргізілуде, деп хабарлайды JANABASTAU.KZ ақпарат агенттігі.

Қазақстан Республикасы Президентінің бастамасы және «Таза Қазақстан» жалпыұлттық жобасы аясында, «Жасыл даму» АҚ қолдауымен білім беру ұйымдарында EcoQolday бағдарламасы жүзеге асырылуда.

EcoQolday — қайталама шикізатты жинау, тасымалдау және қайта өңдеу үдерістерін автоматтандыруға бағытталған цифрлық платформа және мобильді қосымша. Бұл сервис қалдықтарды басқарудың тиімді жүйесін қалыптастырып, халық арасында қалдықтарды бөлек жинау мәдениетін дамытуға ықпал етеді. Оқу кезеңі барысында қала мектептерінде экология және тұрмыстық қатты қалдықтармен жұмыс істеу мәселелеріне арналған оқыту дәрістері мен презентациялар өткізілді.

Оқушылар мен педагогтерге қалдықтарды дұрыс сұрыптау, оның ішінде құрғақ және дымқыл фракцияларға бөлу, сондай-ақ оларды дұрыс кәдеге жарату ережелері түсіндірілді.

EcoQolday іс-шарасы Көкшетау қаласындағы №20 мектепте де өткізілді.

Бұл кездесудің ерекшелігі — оқушылардың жоғары белсенділігі болды. Олар тек дәрістерді тыңдап қана қоймай, өздері экологиялық сағаттар дайындап, өнер көрсетті.

Оқушылар қалдықтарды бөлек жинау туралы білімдерімен бөлісіп, презентациялардан қандай жаңа ақпарат алғандарын айтып, күнделікті өмірде қолданатын экологиялық дағдыларын талқылады. Іс-шара қызықты әрі танымдық деңгейде өтті.

EcoQolday бағдарламасы аясында сұрыпталған қалдықтарды шығару жүйесі де жолға қойылған, бұл қалдықтарды жинаудан бастап қайта өңдеуге дейінгі толық циклді қамтамасыз етеді.

Айта кету керек, оқыту тек оқушыларды ғана емес, педагогтерді де қамтиды, бұл тұрақты экологиялық әдеттерді қалыптастыруға мүмкіндік береді. Осындай бастамаларды жүзеге асыру қоршаған ортаға ұқыпты қарауды тәрбиелеуде және экологиялық саналы ұрпақ қалыптастыруда маңызды рөл атқарады.

Бұл бағыттағы жұмыстар алдағы уақытта да жалғасын табады.

```0