Көкшетау қаласының мектептерінде қалдықтарды бөлек жинау мәдениеті енгізілуде

Көкшетау қаласының жалпы білім беретін мектептерінде оқушылар мен педагогтердің экологиялық мәдениетін қалыптастыру бағытында жүйелі жұмыстар жүргізілуде, деп хабарлайды JANABASTAU.KZ ақпарат агенттігі. 

Қазақстан Республикасы Президентінің бастамасы және «Таза Қазақстан» жалпыұлттық жобасы аясында, «Жасыл даму» АҚ қолдауымен білім беру ұйымдарында EcoQolday бағдарламасы жүзеге асырылуда.

EcoQolday — қайталама шикізатты жинау, тасымалдау және қайта өңдеу үдерістерін автоматтандыруға бағытталған цифрлық платформа және мобильді қосымша. Бұл сервис қалдықтарды басқарудың тиімді жүйесін қалыптастырып, халық арасында қалдықтарды бөлек жинау мәдениетін дамытуға ықпал етеді.

Оқу кезеңі барысында қала мектептерінде экология және тұрмыстық қатты қалдықтармен жұмыс істеу мәселелеріне арналған оқыту дәрістері мен презентациялар өткізілді.

Оқушылар мен педагогтерге қалдықтарды дұрыс сұрыптау, оның ішінде құрғақ және дымқыл фракцияларға бөлу, сондай-ақ оларды дұрыс кәдеге жарату ережелері түсіндірілді. Көкшетау қаласындағы КММ «Әл-Фараби атындағы IT мектеп-лицейін» ерекше атап өтуге болады. Бұл білім ордасында қалдықтарды бөлек жинау жұмыстары жоғары деңгейде ұйымдастырылған. Мектепте пластикті қоса алғанда, қалдықтарды жинау жолға қойылып, олар кейін қайта өңдеуге жіберіледі. Оқушылар экологиялық бастамаларға белсенді қатысып, алған білімдерін тәжірибеде қолдануда.

EcoQolday бағдарламасы аясында сұрыпталған қалдықтарды шығару жүйесі де жолға қойылған, бұл қалдықтарды жинаудан бастап қайта өңдеуге дейінгі толық циклді қамтамасыз етеді. Айта кету керек, оқыту тек оқушыларды ғана емес, педагогтерді де қамтиды, бұл тұрақты экологиялық әдеттерді қалыптастыруға мүмкіндік береді.

Осындай бастамаларды жүзеге асыру қоршаған ортаға ұқыпты қарауды тәрбиелеуде және экологиялық саналы ұрпақ қалыптастыруда маңызды рөл атқарады. Бұл бағыттағы жұмыстар алдағы уақытта да жалғасын табады.