Путин Украинада БҰҰ басқаруындағы уақытша үкімет ұсынды

Ресей президенті Владимир Путин Украинада уақытша сыртқы басқару орнату туралы ұсыныс жасады. Ол бұл басқаруды Біріккен Ұлттар Ұйымы (БҰҰ) жетекшілігімен жүзеге асыруды ұсынып, жаңа сайлау өткізу және бейбіт келіссөздер жүргізуге лайықты үкімет қалыптастыру үшін қажетті қадам деп атады, деп хабарлайды JANABASTAU.KZ ақпарат агенттігі. 

Путиннің айтуынша, мұндай әкімшілік БҰҰ, АҚШ, Еуропа елдері және басқа да серіктестердің қолдауымен демократиялық сайлауды қадағалап, тұрақты үкіметтің құрылуына жол ашуы мүмкін.

Алайда бұл ұсыныс халықаралық қауымдастық тарапынан үлкен күмән мен қарсылыққа тап болды. Украина президенті Владимир Зеленский бұл ұсынысты елдің егемендігін әлсіретуді көздейтін қадам деп бағалап, оны қабылдамайтынын мәлімдеді. АҚШ та бұл идеяны жоққа шығарып, Украинадағы билікті елдің өз Конституциясы анықтайтынын атап өтті.

БҰҰ Бас хатшысы Антониу Гутерриш Украина үкіметін толық қолдайтынын білдіріп, бұл ұсыныс БҰҰ деңгейінде қарастырылмайтынын айтты.

Еуропалық Одақ пен Батыс елдері де Путиннің бұл бастамасын сынға алып, оны қақтығысты ұзартуға бағытталған стратегиялық қадам деп бағалады. Батыс дипломатиясы мен АҚШ-тың араағайындығымен жүргізілген келіссөздер мен уақытша бітімге қарамастан, Украина мен Ресей арасындағы қақтығыс жалғасуда.