ҚАЗҰУ мақтанышы – орта азияның үздік студенті

«Жастар ел болашағы ғана емес, елдің бүгіні де.  

Біз талантты жастарды қолдауға әрқашан дайынбыз». 

— Қасым-Жомарт Тоқаев, ҚР Президенті

Қазіргі заман – білімді де білікті жастардың заманы. Ғылыммен шұғылданып, шығармашылықпен айналысып, спортта жетістікке жетіп, қоғамдық өмірде белсенді бола білген жастар – ел болашағының алтын діңгегі.

Осындай жандардың бірі – Аружан Құдайбергенова, Әл-Фараби атындағы Қазақ ұлттық университетінің Педагогика және психология мамандығы бойынша 4 курс студенті. Жақында ғана ол халықаралық аренада ел намысын қорғап, «Орта Азияның үздік студенті» атағын жеңіп алды. Бұл – жас буынның әлеуеті зор екенін көрсеткен үлкен жетістік.

Аружан Құдайбергенова Халықаралық деңгейде ұйымдастырылған «Орта Азияның үздік студенті» байқауына қатысып, жан-жақты жетістіктерімен дараланып, үздіктер қатарынан көрінді. Байқауды «Bilim-orkenieti» ұлттық инновациялық ғылыми-зерттеу орталығы мен «Үздік студенттер академиясы» бірлесе ұйымдастырған.

Аружанның ғылым саласындағы тың жобалар мен жарияланған мақалалардағы белсенділігі, өнер мен спорттағы табыстары, сондай-ақ университет қабырғасында атқарған қоғамдық жұмыстар мен көшбасшылық қабілеті сарапшылар тарапынан жоғары бағаланды. Оның бұл байқаудағы жеңісі – тек жеке жетістік емес, сондай-ақ білім ордасының абыройын асқақтатқан маңызды нәтиже.

«Бұл байқауға қатысу мен үшін үлкен тәжірибе болды. Өзімді түрлі қырынан танытуға мүмкіндік алдым. Ең бастысы – алған марапат емес, сол жолдағы еңбектің бағалануы менің болашағыма сенім ұялатты. Мені осындай дәрежеге жеткізген педагогика және білім беру менеджменті кафедрасының меңгерушісі Н.С.Әлқожаеваға, тәлім тәрбие берген оқытушыларым Қ.Жумабековаға, К.Есеноваға және басқа да ұстаздарыма алғысымды білдіремін», – дейді Аружан.

Жастардың көпұлтты қатысуымен өткен бұл байқау – білім мен таланттың, көшбасшылық пен белсенділіктің жарқын көрінісі болды. Түрлі елдерден келген үздік студенттердің басын қосқан бұл халықаралық дода – өз әлеуетін көрсеткісі келетін белсенді жастар үшін үлкен мүмкіндік алаңы. Байқауға қатысу барысында Құдайбергенова Аружан өмірбаянын, жетістіктерін растайтын құжаттарын, ғылыми, шығармашылық және қоғамдық бағыттағы белсенділігін дәлелдейтін материалдарын, сондай-ақ фотосуреттерін ұсынды. Оның жан-жақтылығы, еңбекқорлығы және табандылығы әділ қазылар тарапынан жоғары бағаланды.

Салтанатты марапаттау рәсімі еліміздің бас шаһары – Астана қаласындағы Қазмедиа орталығының концерт залында өтті. Қазақстанның зиялы қауымы, қоғам қайраткерлері мен белгілі тұлғалар қатысқан мерекелік кеш ерекше атмосферада өтті. Үздік деп танылған жастардың бірі ретінде Аружан Құдайбергенова да арнайы шақырылып, марапатты елге танымал тұлғалардың қолынан алды. Бұл – Аружан үшін үлкен мақтаныш, ал жас ұрпақ үшін шабыт беретін жарқын үлгі болды.

Байқау қорытындысы бойынша Аружанға бірқатар құрметті марапаттар табысталды. Атап айтқанда, оған студенттік қауымдастықтағы ең жоғары мәртебені білдіретін «Орта Азияның үздік студенті» атты арнайы төсбелгі, жеке куәлік, І дәрежелі диплом және жеңімпаз мәртебесін айқындайтын арнайы статуэтка берілді. Бұл марапаттар – оның еңбегі мен табандылығының, үздік болуға деген ұмтылысының символына айналды.

Жас ұрпаққа ғылым мен ізденісті бағдар еткен ұлы ойшыл Әл-Фарабидің «Адам өз мақсатына ақыл-парасат, ғылым-білім арқылы жетеді» деген сөзі Аружанның өмірлік ұстанымына айналғандай. Өзінің табандылығы мен жан-жақтылығының арқасында ол университетіміздің абыройын халықаралық деңгейде асқақтатып, өзге студенттерге шынайы мотивация бола білді.

Аружан Құдайбергенова – тәртіптілігімен, білімге деген ынтасымен, шығармашылық пен ізденіске деген құлшынысымен ерекшеленетін студент. Ол әрдайым жауапкершілікпен әрекет етіп, тапсырылған істі мүлтіксіз орындауға тырысады. Университет қабырғасында ғана емес, түрлі деңгейдегі жобалар мен байқауларда да белсенділік танытып келеді. Осындай жастар – еліміздің болашағының жарқын кепілі. Жетістігімен бөлісу – шабыт беру, сол себепті Аружанның бұл жеңісі басқа студенттер үшін де үлкен мотивация боларына сенімдімін.

Мейрамкүл Дәуренбекқызы Мырзағұлова, педагогика және білім беру менеджменті кафедрасының аға оқытушысы