ҚХА – 30: Бірлікке бет алған даңғыл жол

Биыл Қазақстан халқы Ассамблеясына 30 жыл толды. Бұл құрылым – еліміздегі этносаралық келісім мен қоғамдық тұрақтылықтың берік тірегіне айналған бірегей институт. 1995 жылы құрылған Ассамблеяның басты мақсаты елдегі барлық этностардың мүддесін ескеретін, өзара құрметке негізделген тұрақты диалог алаңын қалыптастыру болатын. Үш онжылдықта бұл міндет толық жүзеге асып, Ассамблея қазақ қоғамының маңызды интеграциялық тетігіне айналды, деп хабарлайды JANABASTAU.KZ ақпарат агенттігі.

Ассамблеяның ең үлкен жетістігінің бірі – ұлттық бірлік идеясын күнделікті өмірдің ажырамас мәдениетіне айналдыру. Бүгінде елімізде 100-ден аса этнос тату-тәтті өмір сүріп, 30-дан астам тілде жұмыс істейтін шығармашылық орталықтар, мәдениет үйлері, этномәдени бірлестіктер қызмет етеді. Олар тек салт-дәстүрді сақтаумен шектелмей, білім беру, мәдениет, әлеуметтік бастамаларды қолдау арқылы қоғамды дамытудың белсенді қатысушылары болды.

Ассамблея соңғы жылдары қоғамдық келісіммен қатар, азаматтық бірегейлікті нығайтуға, мемлекеттік тілдің мәртебесін арттыруға, жастар арасында толеранттылық мәдениетін қалыптастыруға ерекше ден қойып келеді. ҚХА жанындағы Аналар кеңесі, Жастар үйлестіру кеңесі, медиация кабинеттері – қоғамдағы үйлесім мен татулықты сақтауға бағытталған тиімді құралдар.

30 жыл – тарих үшін қысқа мерзім болғанымен, Қазақстан халқы Ассамблеясының бұл кезеңде атқарған жұмысы ел дамуына салмақты үлес қосты. ҚХА бүгінде еліміздегі тұрақтылық пен ынтымақтың символына айналып, «Бір халық – бір ел – бір тағдыр» қағидатын нақты іске асырып келеді.

Ассамблеяның мерейтойы – өткен жолға есеп беру ғана емес, болашаққа жаңа міндеттер жүктейтін кезең. Жаһандану дәуірінде бейбітшілік пен бірлік құндылықтарының маңызы бұрынғыдан да артып отыр. Осы бағытта Қазақстан халқы Ассамблеясы ұлттық татулықты нығайту жолындағы стратегиялық институт ретінде өз рөлін одан әрі жалғастыра бермек.

Осы мерейлі датаға орай Қосшы қаласы кітапханасының директоры Майгүл Қариғазының пікірін сұраған едік.

Қазақстан халқы Ассамблеясының 30 жылдық жұмысы – этностар арасындағы сенім мен өзара құрметтің тұрақты жүйеге айналғанын көрсетеді. Ассамблея осы уақыт ішінде мәдени алмасуды күшейтіп, әр этностың өзіндік ерекшелігін сақтай отырып, ортақ азаматтық құндылықтарды қалыптастыруға ықпал етті. ҚХА өңірлерде диалог алаңдарын дамытып, қоғамдағы мәселелерді келісім арқылы шешуге мүмкіндік берді. Этномәдени бірлестіктердің белсенділігі артып, жергілікті бастамаларға жаңа серпін берілді. Жастарға бағытталған жобалар да бірлік идеясын нығайтып, көпэтносты қоғамда ашықтық пен түсіністікке тәрбиелеуде маңызды рөл атқаруда. Ассамблеяның 30 жылдық тәжірибесі – елдегі тұрақтылық пен келісімнің нақты дәлелі. Бұл институт алдағы уақытта да қоғамды біріктіру жолындағы маңызды миссиясын жалғастыра беретіні анық, - дейді ол.