Теледидарға орамалмен шығуға кім қарсы болды?

Белгілі айтыскер ақын Сара Тоқтамысова орамал таққалы біршама қиындыққа тап болғанын жасырмады. Бұл туралы janabastau.kz хабарлайды.

Өнер иесінің айтуынша, орамал таққалы қоғам пікірі екіге бөлінген. 

“Бүгін бір ағамыз: “Басыңдағы орамалың үшін құрметтеймін” деді. Өткенде бір кісі телевидениеден хабарласып: “Сізді бағдарламаға шақырайық деп едік. Орамалыңызды шешіп келесіз бе?” дейді. “Неге” деппін сасқанымнан. Телевидениеге орамалдыларға рұқсат жоқ” дейді. Алланың парыз еткенімен Алладан қорықпайтындар ғана алысады-ау” деп күрсіндім де қойдым.

Орамал тақтың ба, соған сай бол! Орамал тақтың ба, сөзіңе ие бол! TikTok-та немесе Instagram-да отырып алып, аузыңа келгенді айтып, балағаттап, кім көрінгенге жеккөрінішті болма. Орамал тақтың ба, өзіңе ие бол! Секең-секең етіп, әржерде билеп, шошаң-шошаң етіп, дөрекі мінез көрсетіп, қаншама жаулық таққан жандардың арына сын келтірме. Орамал тақтың ба, біреуді алдама, біреуді арбама! Себебі орамал – сенің абыройың”, – деп жазды айтыскер ақын.