16 жастағы жеткіншек рақымшылықпен бостандыққа шықты

Алматыдағы кәмелетке толмағандарға арналған №11 түзеу мекемесінен 16 жастағы жасөспірім рақымшылық аясында босатылды. Ол енді туған жері Маңғыстауға оралып, отбасымен қауышты, деп хабарлайды janabastau.kz ақпарат агенттігі Azattyq Rýhy-на сілтеме жасап.

Қылмыстық-атқару жүйесі департаментінің хабарлауынша, жасөспірім 1 жыл 3 ай жаза мерзімін өтеген. Ол бұл уақытта мекеме ішіндегі мектепте білім алған, тәртіп сақтап, үлгілі мінез-құлқымен ерекшеленген. Сол себепті оған ынталандыру шарасы ретінде рақымшылық қолданылған.

«Жазасын өтеу кезінде бала тәртіпті болды, оқу процесіне белсенді қатысты. Бостандыққа шыққанда, заңды құрметтейтін азамат болуға уәде берді», – дейді департамент өкілдері.

Жасөспірімнің айтуынша, ол бала күнінен бері сіңлілері мен бауырларымен бірге соқыр әжесінің қолында өскен. Ата-анасы ажырасып кеткен. Отбасы тек әжесінің зейнетақысымен күн көрген. Бұл қаражат тек ең қажетті азық-түлік пен күнделікті мұқтаждықтарға жеткен.

• Жасөспірім 14 жасында ұрлық жасағаны үшін қамауға алынған
• Ол сәнді киім мен дәмді тағамды қалайтынын, бірақ тұрмыстың ауыртпалығы оған кедергі болғанын айтқан

«Басқа балалар сияқты мен де жақсы өмір сүргім келді», – дейді ол

Бала түрмеден босатылған соң, оны Маңғыстауға дейін түзеу мекемесінің қызметкері арнайы пойызбен алып барды. Себебі әжесі немересін қарсы алуға келе алмаған. Қазіргі уақытта жеткіншек туған үйіне жетіп, бауырларымен және әжесімен қауышты.

Еске салсақ, 2025 жылы Қазақстан Конституциясының 30 жылдығына орай рақымшылық заңы қабылданған болатын. Маусым айының ортасында Сенат аталған заң жобасын мақұлдады.