«Көк шалғын»: әкім айтқан «жылы жарық» пен әдемі ағаштар Көкшетаудың проблемасын шеше ме?

Көкшетауда 3 шақырымға созылған «Көк шалғын» саябағы ашылды. Ашылу рәсімі Халықаралық қарттар күніне орай өтіп, концерт, жаппай вальс, «мың адамға шай» рекорды сияқты шоуға толы болды, деп хабарлайды JANABASTAU.KZ ақпарат агенттігі. 

Жоба мемлекет басшысының қоғамдық кеңістіктерді дамытуға арналған бірыңғай концепция әзірлеу жөніндегі тапсырмасына сәйкес жасалды. Біз заманауи технологиялар мен сәулеттік шешімдерді, қоғамдық қауіпсіздік элементтерін енгізуге ұмтылдық. Көріктендіруге ерекше көңіл бөлінді – тек көпжылдық өсімдіктер отырғызылды. Жарықтандыру да ойластырылған: көзді шаршатпайтын, жайлы, жылы жарық қолданылды. Қаланы абаттандыру жұмыстары жалғасын табады. Келесі жылға ауқымды жобалар жоспарланған: Көпе көлінің жағалауын абаттандыру жалғасады, «Сарыарқа» шағынауданы кешенді түрде көріктендіріліп, халықаралық деңгейдегі жаңа стадионның құрылысы басталады, - деді сонда облыс әкімі Марат Ахметжанов.

Әкімнің сөзі әдемі. Бірақ тереңірек қарасақ, жобаның астарында көп сұрақ бар.

Бюджет қайда, күтім шығыны қанша?

Саябақтың құны қанша болды? Жыл сайын оны күтіп-ұстау қаншаға түседі? Бұл туралы ашық ақпарат жоқ. Субұрқақ, жарық, гүл-бақша – бәрі бюджеттен тұрақты шығын талап етеді. Бірақ оған кім, қалай жауап береді? Әзірге әкімдік «ашылу шоуымен» шектеліп отыр.

Халықаралық тәжірибе ме, әлде витрина ма?

Әкім «шетелдік тәжірибені ескердік» деді. Бірақ Көкшетаудың басты проблемалары – жолдың сапасы, қоғамдық көліктің жетіспеуі, ауызсудың тапшылығы. Әлемдік тәжірибеде қоғамдық кеңістік алдымен қолжетімділік, қауіпсіздік, инклюзивтілік принципіне сүйенеді. Ал бізде бастысы – фотоға жақсы шығатын фон мен рекордтар ғана.

Қауіпсіздік пен қыстың сынағы

Әкім «жылы жарық» туралы айтты. Бірақ саябақтың қысқы қолданылуы ойластырылды ма? Желден қорғайтын шешімдер бар ма? Қар тазалау, көктайғақтың алдын алу қарастырылды ма? Қауіпсіздік тек жарық шамымен шектелмейді, ол – қылмыстың алдын алатын толыққанды қала дизайны.

Қарттар күні ашылды, бірақ қарттарға ыңғайлы ма?

Жоба қарттарға арналып ашылды. Бірақ жаяу жүргіншіге арналған жолдар арбамен жүруге қолайлы ма? Тынығуға арналған көлеңке аймақтары бар ма? Қарттар мен мүмкіндігі шектеулі адамдарға арналған нақты шешімдер туралы әкімнің сөзі айтылмады.

KPI қайда?

Қоғамдық кеңістіктің тиімділігі концерт және рекордпен өлшенбейді. Нақты көрсеткіштер – тұрғындардың қаншасы пайдаланды, қауіпсіздік деңгейі қалай өзгерді, экологиялық әсері қандай болды?.. Бірақ бұл деректер жоқ. «Әдемі саябақ ашылды» деген есеп қана бар.

Сыртқы сән болғанмен, жүйелі шешім көрінбейді

«Көк шалғын» саябағы Көкшетауға сұлулық сыйлаған шығар. Бірақ тұрғындардың тұрмысын түбегейлі өзгертпейді. Әкімнің сөзінде «жарық», «өсімдік», «стадион» деген ұғым көп, ал халық үшін ең қажеттісі – қолжетімді баспана, сапалы медицина, арзан тариф, таза су.

Сұрақ сол күйінде: Ақмола облысының басшылығы көбірек күшті халықтың тұрмысын түзетуге салып отыр ма, әлде әдемі витрина жасауға ма?