Ақтөбеде газ құю бекетінде көлік өртеніп, үш адам тірідей жанып кетті

Ақтөбеде газ құю бекетінде тұрған көлік өртенді. Салдарынан үш адам тірідей жанып кетті, деп хабарлайды JANABASTAU.KZ.

Облыстық төтенше жағдайлар департаментінің мәліметінше, олардың екеуі – кәмелетке толмаған бала.

"19 маусымда сағат 22:55-те 112 пультіне Ақтөбе қаласындағы Бөгенбай батыр көшесінде орналасқан автогаз құю станциясының аумағында автокөліктің өртенгені туралы хабарлама келіп түст", - делінген ТЖД хабарламасында. 

Өрт хабарлама түскеннен кейін 8 минут өткен соң сағат 23:03-те толықтай сөндірілді. Өрт сөндірушілер жалынның автогаз құю станциясының нысандарына таралуына жол бермеді. 

Өртті сөндіру барысында автокөлік салонынан үш адамның мәйіті табылды, олардың екеуі – кәмелетке толмағандар. Бір зардап шегуші медициналық мекемеге жеткізіліп, ауруханаға жатқызылды. Оқиғаны жою жұмыстарына Жедел-құтқару жасағының құтқарушылары мен Апаттар медицинасы орталығының мамандарын қоса алғанда, ТЖД-ның 50 ге жуық қызметкері және 10-нан астам техника жұмылдырылды. Өрттің шығу себептері анықталып жатыр. Аталған факті бойынша қажетті жедел-тергеу іс-шаралары жүргізілуде.