Ақтөбелік емші 136 адамға 579 млн теңге несие рәсімдетіп алған

Ақтөбе қаласының №2 соты емші Сұлушаш Қазбаеваға үкім шығарып, оны 136 жәбірленушіге қатысты алаяқтық жасағаны үшін кінәлі деп таныды, деп хабарлайды JANABASTAU.KZ ақпарат агенттігі turkystan.kz-ке сілтеме жасап.

Әйел биыл қаңтарда ұсталған. Бұған дейін оның өзіне жүгінген адамдарды «ізгі мақсаттар үшін» несие алуға көндіргені белгілі болған.

Сотталушы мешіт пен медициналық орталық салу, сондай-ақ кәмелетке толмаған баласын шетелде емдету және өз «емшілік ісін дамыту» сылтауымен әртүрлі банктерден өз пациенттерінің атына несие рәсімдетіп, алынған ақшаны қайтаруға ниетті болмаған, – делінген сот хабарламасында.

Жәбірленушілерге келтірілген жалпы шығын – 579 млн теңге.

Сот барысында Қазбаева өз кінәсін мойындамаған. Прокурор оған 6 жыл 8 ай бас бостандығынан айыру жазасын сұрап, жәбірленушілердің азаматтық талаптарын қанағаттандыруды талап етті. Сот мемлекеттік айыптаумен келісе отырып, Қазбаеваға 6 жыл 8 ай бас бостандығынан айыру жазасын тағайындап, азаматтық талаптарды ішінара қанағаттандырды.

Емші жазасын 2 жылдан кейін өтей бастайды. Ол кезде оның баласы 14 жасқа толады.

Үкім әзір заңды күшіне енген жоқ.