Ашық диктант қазақтың көрнекті қайраткерінің 130 жылдық мерейтойына арналды

07.09.23 сағат 01:20 Редакция таңдауы

887

Тілдер күніне орай Қосшы қаласында «Мағжан Жұмабаев – заманның заңғар тұлғасы» тақырыбында жалпықазақстандық ашық диктант өтті. Оған жастар ұйымдарының өкілдері, мемлекеттік және азаматтық қызметшілер, дәрігерлер, ұстаздар, студенттер мен оқушылар, этномәдени бірлестіктердің, азаматтық қоғамның өкілдері қатысты. Жалпыхалықтық диктант Қазақстан халқы Ассамблеясының 2022-2026 жылдарға арналған даму тұжырымдамасын іске асыру жөніндегі іс-қимыл жоспарына сәйкес «Мың бала» мәдени-ағартушылық жобасы аясында өткізілді. Мәтінді Қазақ радиосының журналисі Жанболат Шәкім оқыды.

– Тілдер мерекесі бұрын 22 қыркүйекте аталып өтілетін. 2017 жылы Үкіметтің Қаулысымен ұлт ұстазы, тіл реформаторы Ахмет Байтұрсынұлының туған күніне орай 5 қыркүйекке ауыстырылды. Осы күні жалпықазақстандық диктант жазу практикасы енгізілді. Бұл «Сауатты ұрпақ – сауатты ұлт» бастамасы негізінде қолға алынған, – деді Жанболат Шәкім.

Іс-шараға Қосшы қаласынан сексенге жуық ниет білдірушілер қатысты. Ұйымдастырушылардың айтуынша, диктанттың мақсаты – Қазақстан халқын біріктіруші фактор ретінде мемлекеттік тілдің қоғамдағы рөлін нығайту.

– Алдымен мәтінді басынан аяғына дейін бір оқып шығамын, мән беріп, тыңдап отырыңыздар. Қай жерде жаңа ой басталады, қай жерде тыныс белгісі бар. Бір сөйлемді үш рет оқимын. Ең соңғы адам жазып болғанда ғана келесі сөйлемді бастамаймын. Диктантты жазып бітіргеннен кейін сіздер тексеріп алу үшін тағы бір мәрте мәтінді қайталап оқимын. Осымен диктант аяқталады, – деп толықтырды Қазақ радиосының журналисі.

«Мағжан Жұмабаев – заманның заңғар тұлғасы. Биыл қазақ халқының біртуар перзенті, Алаш қайраткері, ақын, публицист Мағжан Жұмабаевтың туғанына 130 жыл толды...» деп басталған диктант 40 минутқа созылды. Қатысушылар сауатты жазудың маңыздылығына ерекше назар аударды.

Мемлекеттік тілдің құзырын арттыру елімізде тұратын барлық азаматтардың парызы екені айқын. Мемлекет басшысы Қасым-Жомарт Тоқаев атап өткендей, «Қазақ тіліне сұраныс артқанда ғана ол көпшілік кең қолданатын тіл болады. Түптеп келгенде, бірнеше тіл білу – әр адамның мәдениеттілігінің белгісі. Ал мемлекеттік тілді, әсіресе, ана тілін, яғни қазақ тілін білу – қандай да бір азаматтың мәдени өресі, азаматтық жауапкершілігі қаншалықты биік екенін білдіреді. Сондай-ақ қаншалықты патриот екенін көрсетеді».

Жанар АХМЕТОВА