Әскерде көз жұмған 19 жастағы сарбаз жер қойнына тапсырылды

Шымкентте әскери қызметші, 19 жастағы Дінмұхамед Шынарбек жер қойнына тапсырылды. Бұл туралы Janabastau.kz ақпарат агенттігі КТК телеарнасына сілтеме жасап хабарлады. 

Марқұмның туыстары оның өзіне қол салғанына сенбейді. Олар қайғылы жағдайға белгілі бір тұлғалардың кінәлі екеніне сенімді, сондықтан оқиғаның толық әрі әділ тергелуін талап етуде.

Дінмұхамед егіз бауыры Даниялмен бірге әскери бөлімде қызмет еткен, бірақ кейін ол Алматы облысындағы Мәтібұлақтағы бөлімшеге ауыстырылған. Сарбаз өз ауысуына қарсы болғанын және туыстарына бірнеше мәрте телефон арқылы шағымданғанын айтқан.

Марқұмның жақындары «Дінмұхамедтің өзіне қол салуы мүмкін емес» деп санайды және әскери бөлімде қандай да бір заңсыздық болғанын алға тартып, оқиғаның терең тексерілуін талап етуде. Қазіргі уақытта сарбаздың өліміне қатысты қылмыстық іс қозғалып, арнайы комиссия бөлімшеде тексеріс жүргізіп жатыр.